Kommune Qeqertalik: Suliaq coronavirusilimmut tunngasoq malinnaavigeqqissaarparput
Aasiammiu ataaseq coronaviruseqarpoq.
Taanna Danmarkimiinnermini aamma coronaviruseqarsimavoq. Aasiannut ullualuit matuma siorna utinnginnermini arlalerialuni misissortinnermini coronaviruseqanngitsutut nalilerneqartarsimavoq.
Kommune Qeqertaliup nunatta nakorsaanera isumasioqatigereeraalu suliaq pineqartumut tunngasoq ulluni tulliuttuni malinnaavigeqqissaarniarlugu aalajangerpoq. Kommunillu kikkulluunniit Tunillaassortunik Nappaalasoqarneranut Ataatsimiititaliarsuup innersuussutaanik malinninnissaannut inappai.
Coronaviruseqartoq ilaqutaalu angerlarsimaannaqqusaapput, nunattalu nakorsaanera oqarnera naapertorlugu tunillatsissinnaaneq aarlerinartortaqanngingajappoq.
AAMMA ATUARUK Coronavirusimik tunillatsissimasumik Aasianni nassaartoqartoq
Siornatigut Covid-19-eqarsimasut peqqissereernerminni toqqusaaminni taassuminnga suli viruseqarsinnaasartut tassungaluunniit ersiuteqarsinnaasartut ilisimaneqareerpoq. Taamaammat misissoqqinneqarnerminni suli coronaviruseqartutut nalilerneqartarput.
- Tunillatsissimasoq aaqqereeraluarluni misissugassamik tigusiffigineqaqqikkami tunillaassuukkunnaareersumik suli coronaviruseqartutut ersiuteqarsinnaanera ilimagineqarpoq. Kisianni tunillaassuutilertoqarsinnaanera avaqqussinnaanngilarput. Taamaammat suliami matumani soorunami sunut tamanut piareeqqaniarsarivugut, nakorsaaneq Henrik L. Hansen oqarpoq.
Coronaviruseqartoqarnera Kommune Qeqertalimmut sapaatiummat nalunaarutigineqarmat kommunip borgmesteria, pisortaanerigallagaa, sullissiviini pisortaq, politiit peqqissaavimmilu nakorsaaneq najuupput.
Coronavirusimik tunillatsinnginnissamut tunillatsittullu ikinnerpaajunissaannut innersuussutit ukuupput:
- Immissinnut minnerpaamik meterinik marlunnik ungasitsigigitsi
- Assatit errortukulallugillu tunillannartuiaasertakkit
- Talinnut quersortarit tangajortarilluunniit
- Maangaannaq qisernak
- Eqqiaasarit silaannarissaasarlutillu
- Danmarkimiit tikittut kikkulluunniit tikinnerminniit sapaatit akunnerini marlunni angerlarsimaannassallutillu Covid-19-eqarnermut ersiuteqarpata peqqinnissaqarfimmut oqarasuaatikkut piaartumik saaffiginnissapput
- Tikittut kikkulluunniit tikinnerminnit ullut tallimassaanni najukkaminni peqqissaavimmi napparsimmavimmiluunniit Covid-19-imut misissorteqqissapput
- Inuiaqatigiinni utoqqaat sanngiinnerusullu nakkutigikkit.