Nakorsaaneq ernumasoq: Kangerlussuarmi kapuisoqarnerani inuusuttut affaannaat akuersisut

Ulloq januaarip ulluisa sisamaat 2021 nunarput pillugu oqaluttuarisaanermi nalunaarneqassagunarpoq.

Ullormi tassani kalaallimik covid-19-imut akiuussuserneqartoq siulleq kapitippoq

Tamatuma kingorna amerlasuut akiuussuserneqarnissamik neqeroorfigineqaraangamik akuersisarput. Illoqarfinni annerni 80-ileereersimasut 80 procentiisa akiuussuserneqarnissartik akueraat.

Peqqinnissamulli oqartussat sapaatit akunnerini kingullerni taama tapersiisoqanngitsoq maluginiarpaat, nakorsaaneq, Henrik L. Hansen oqarpoq. Tamannalu ajuusaarnartippaa.

- Piffissami kingullermi Kangerlussuarmi, Maniitsumilu kapuivugut, nunattalu kujatani kapuineq aallartinneqarluni, akiuussuserneqartartulli ikiartorput. Taama pisoqarnera ajuusaarnartingaatsiarparput, nakorsaaneq oqarpoq.

- Amerlanerpaat illersorneqarnissaat pisariaqartipparput, inuiaqatigiinnili sapinngisamik amerlanerpaat akiuussuserneqarsimanissaat aamma pisariaqartorujussuuvoq, taamaaliornermi inuiaqatigiinni tunillaassuuttoqalernissaanut annikillisaataassammat.

Nakorsaaneq: Kapitittut tunillaassuutitsinaveersaarnissamut ikippallaarput

Kangerlussuarmi nunatsinnut avataanit isaaffiunerpaasumi sapaatip akunnerata siuliani akiuussusersuisoqarpoq. Tassanilu innuttaasut 16-ileereersimasut tamarmik covid-19-imut akiuussutissamik neqeroorfigineqarlutik.

Nakorsaanertulli – tamat akiuussuserneqarnissaat kissaatigigaanni kisitsisit pitsaanngillat. 50-it 60-illu akornanni 71 procentiinnaat akiuussutissamik kapitipput.

Innuttaasuni inuusunnerusuni tamanna pitsaanerunngilaq. Inuusuttuni 20-nit 30-nut ukiullit affaannaat akiuussuserneqarput.

- Sumiiffinni assigiinngitsuni annikinnerusunik nappaalasoqarleraluarpat akiuussuserneqarsimasut ikippallaarujussuarput, Henrik L. Hansen oqarpoq.

Soorli inuit qujaannarpat? Tamanna nakorsaanerup akiuminaatsippaa:

- Neqeroorut tusagassiuutitigut illoqarfinni saqqummiussinikkut neqeroorutigisarparput, akiuussutisserneqarnissamulli qujaannartut takkunneq ajormata amerlanertigut oqaloqatigineq ajorpagut.

AAMMA ATUARUK Kangerlussuarmi innuttaasut siullermeertumik kapitikkiartunngitsut

Apeqqut: Siusinnerusukkut inuit ullormi pineqartumi akiuussuserneqarnissap periarfissaaneranik ilisimannissimannginnerat nalaanneqarnikuuvoq. Inuit akiuussusiiartortusi nalunngilaat?

- Aap ilimagaara. Sumiiffinnit siullernit misilittakkat taakku pissutigalugit tusagassiuutitigut, inoqatinut attaveqaatitigut inunnullu toqqaannartumik sms-ernikkut immikkut ittumik suliniuteqartoqarpoq.

- Taamaammat akiuussusiisoqarnissaanut neqerooruteqarneranik tamangajammik ilisimanninnissaat qularutiginngilarput, Henrik L. Hansen oqarpoq.

Modernamit Pfizer/BionTechimiillu akiuussutissat kisimik atorneqartut

Nakorsaaneqarfiulli innuttaasut ilaasa akiuussutissat qanoq ittut nunatsinni atorneqarnersut nalornissutigigaat paasisimavaa.

- Nunatta kujataani nakorsaasiorfimmit Modernamit akiuussutissap atorneqarnera erseqqissaatigissallugu pingaaruteqarluinnarpoq, Henrik L. Hansen oqarpoq, nangillunilu:

- Akiuussutissaq taanna USA-mi Europalu inunnut millionilinnut maanna aamma atorneqareerpoq, taassumalu kingunerluuteqarneranik takussutissaqanngilaq.

AAMMA ATUARUK Kinguaattoorneq: Inuiattut ullorsiornissatsinnut akiuussuserneqarnissarput angumerisinnaanngilarput

Nakorsaanerup oqarnera naapertorlugu akiuussutissap AstraZenecameersup sunniutai pillugit nunarsuarmi tusagassiorfinnit assigiinngitsunit allaaserinnittoqarnera nalornissuteqartoqalerneranut pissutaasinnaavoq.

Akiuussutissap ilungersunartumik qaqutigoortumilli sunniuteqarnera pissutigalugu Danmarkimi Peqqinnissamut aqutsisoqarfiup Europami nunanit allanit siulliulluni akiuusutissaq taanna atorunnaarpaa.

Nunatsinnilu akiuussutissat atorneqartut Danmarkimeersuusarnerat pissutigalugu akiuussutissaq taanna aamma maani atorneqarnavianngilaq.

Akiuussutissat maannamut atorneqartut tassaapput akiuussutissaq Modernameersoq aamma Pfizer/BionTechimeersoq. Taakkulu taqqamik milikartoortitsisinnaanissaannut pasineqartoqanngilaq.