Kangerlussuarmi innuttaasut siullermeertumik kapitikkiartunngitsut
Kangerlussuarmi inuit 367-it coronavirusimut akiuussutissamik siullermeertumik kapitinnissamut piffissaqarsimagaluarput.
Taakkunanngali 69-it takkutinngillat – tamannalu Sisimiuni nunap immikkoortuani nakorsaanerup, Helle Olsenip uggoringaatsiarpaa.
- Taama amerlatigisut takkutinnginnerat uggornartorujussuuvoq, pissutigalugu Kangerlussuaq avataniit isaaffiuvoq. Inunnik tunillatsissimasinnaasunik tikittoqartarpoq.
AAMMA ATUARUK Kinguaattoorneq: Inuiattut ullorsiornissatsinnut akiuussuserneqarnissarput angumerisinnaanngilarput
- Taamaammat innuttaasut maani akiuussuserneqaqqissaarnissaat pitsaasorujuussaaq. Ajoraluartumilli taamaattoqanngilaq, nunap immikkoortuani nakorsaaneq KNR-imut oqarpoq, nangillunilu:
- Takkutinngitsut tamarmik sianerfigaagut. Ilaa kapitikkusunnginnerarput. Allallu aallaqqallutik, taamaakkaluartorli taamaatitsinissamik nalunaaruteqanngillat.
Akiuussutissat sinneruttut Maniitsumi atorneqartut
Akiuussutissalli atunngitsoortut asuliiginnarneqanngillat, taakku Maniitsuliaanneqarput, tassanilu sisamanngornermi tallimanngornermilu kapuisoqarnissaa pilersaarutaalluni, Helle Olsen paasissutissiivoq.
- Maniitsumi kapuinermi ulloq siulleq ingerlalluarpoq. 470-it ippassaq akiuussutisserneqarput. Ullumili amerlasuunik takkutinngitsoqarnera nalaateqqipparput.
Innuttaasut kapitinnissamut tunngatillugu paasissutissiiffiginissaannut atatillugu peqqinnissaqarfik allatut iliorsimasinnaagaluarnersoq apeqqummut ima akivoq:
- Kangerlussuarmi kapuisoqarnissaata arlaannit ilisimaneqarsimannginnissaa takorloorsinnaanngilara. Qanoq allatut iliorsimasinnaagaluarnerluta naluara. Kapitittussat tamarmik sms-ikkut attaveqarfiginiarsarigaluarpagut, taamaalillutik soqutiginninngikkunik nalunaaruteqarsinnaallutik. Takkutinngiinnarpulli.
Kangerlussuarmi innuttaasut 16-ileereersimasut tamarmik coronamut akiuussutissamik kapitinnissamut neqeroorfigineqarput. Maniitsumi innuttaasut 50-ileereersimasut neqeroorfigineqarlutik.