VIDEO Najukkami suleqatigiinnerup nukittunerulernissaa Chemnitz Narupip qilanaarivaa
![](/sites/default/files/styles/image_934x467/public/oembed_thumbnails/2022-12/2pperfYVElQ5nfkrKipNCBXXr2Ot8mHk0vbqnbU-kOs.jpg?itok=ijo4GbYD)
Najukkanilu ataatsimiititalianut ilaasortassat tamarmik immikkut tallimanik ilaasortaqartussat inuttassaat maanna toqqarneqarsimalerput, taakkulu kommunalbestyrelsimit akuerineqariarpata suliassartik aallartissinnaassavaat. Borgmester Asii Chemnitz Narupillu kommunalbestyrelsip illoqarfinnit pingasuusunit immersorluarneqarnissaa isumalluarfigaa.
- Siullertut oqaatigissavara kommunalbestyrelsimi ataatsimiititanut ataavartunut toqqaannartumik oqaluuserisassanngortitsisinnaapput. Taamaalillutik isumaqarpunga sunniuteqaqataanissaq pitsaasumik aqqutissiuunneqartoq. Tunngavilersorluakkanik oqaluuserisassanngortitsisinnaapput.
Aamma atuaruk Sermersooq najukkami ataatsimiititaliaqalernissamut piareerpoq
- Kommunerput isorartoqigami, sumiiffinni ataasiakkaani susoqarpiarnersoq ilaatigut arajutsisoortaratsigu. Aamma taassuma saniatigut aningaasaliissutinik aalajangersimasunik taakkununnga illuartitsinikuuvugut, taamaalillutik illoqarfimmi assigiinngitsutigut pikialaartitsinissamut suliniuteqarnissamullu aningaasaliissutit taakkua aquttussaassavaat. Taamaalillunga isumaqarpunga illoqarfinni taakkunani inuunerup suli nuannernerulersinnissaanut taakkua peqataakutsuussapput, Kommuneqarfik Sermersuumi borgmesteri, Asii Chemnitz Narup, KNR-imut taama oqarpoq.
Najukkami oqartussaaqataaneq pingaartinneqarpoq
Kommunerujussuit sisamat, Kommuneqarfik Sermersooq, Qaasuitsup Kommunia, Qeqqata Kommunia aamma Kommune Kujalleq 2009-mi pilersinneqarnissaat tikillugu Kalaallit Nunaanni kommunit 18-iupput.
Kommuniusimasullu tallimat Kommuneqarfik Sermersuumut taamani kattussuunneqarpoq.
- Kommunerujussuanngornitsinni malugaarput oqartussaaqataaneq qanoq sanngiilliallassimatigisoq, aamma illoqarfitsinni (Nuuk, aaqq.)
- Taannalu illuatungilerniarlugu najukkami oqartussaaqataanerup nukittorsarneqarnissaa ilungersuussimavarput aallullugulu. Massakkullu piviusunngoraluttuarnerani nuannaartorujussuuvunga, borgmesteri oqarpoq.
Najukkami ataatsimiititaliani ataasiakkaani ilaasortat ullumi akuerineqariarpata sapaatit-akunneri pingasut qaangiutsinnagit inissitsiteriffiusumik ataatsimiittussaassapput.
Tasiilami 17-inik ukiulik Pia Gry Christensen ilaatigut qinerneqarpoq. Taassuma inuusuttut sullikkusuppai illoqarfigisamilu tusarnaartitsisaerfeqannginnera iliuuseqarfigiumallugu. Frederik Petersenilu 73-nik ukioqartoq Paamiuni najukkami ataatsimiititaliamut qinigaasut ilagaat. Taassuma illoqarfimmi kalaallimineerniarfiup pitsanngorsarneqarnissaa ilaatigut sulissutigerusuppaa.