Sermersooq najukkami ataatsimiititaliaqalernissamut piareerpoq
Kommuneqarfik Sermersuumi borgmesteri kommunimi illoqarfinni sisamaasuni innuttaasunik ataatsimiititsisareerpoq, najukkami oqartussaaqataanermut tunngasuni isumassarsiorniarluni. Innuttaasunik ataatsimiititsineq kingulleq marlunngormat Tasiilami ingerlanneqarpoq.
- Kommunerput ataatsimoortikkusupparput, innuttaasullu tamaasa oqartussaaqataatillugit. Kommuneqarfik Sermersuumi kommunerujussuarmi periarfissat atorluarnissaat toqqarparput”, borgmesteri Asii Chemnitz Narup oqarpoq.
Paamiut, Tasiilaq Ittoqqortoormiillu najukkami ataatsimiititaliaqalissapput, ataatsimiititaliallu innuttaasunik tallimanik ilaasortaqassapput taakkulu innuttaasunik ukiumoortumik ataatsimiititsinermi toqqarneqartassapput.
Nuuk aamma najukkami ataatsimiititaliaqalissaaq, tamannali aatsaat aappaagu pisussaavoq.
Najukkami ataatsimiititaliat najukkami pissutsit pillugit siunnersuuteqartassapput, illoqarfitsik pillugu aalajangiisoqassagaangat tusarniarneqartarnissaat qulakkeerniarlugu. Aammattaaq najukkami sammisassaqartitsinernik aaqqissuisarnissaat eqqarsaataavoq.
Najukkami ataatsimiititaliornissaq pillugu Tasiilami innuttaasunik ataatsimiititsisoqarmat inuit 60-it missaat peqataapput, taakkununnha ilaallutik inuusuttorpaaluit, taakkulu inuusuttut 16-init ukiullit najukkami ataatsimiititaliamu aamma toqqarneqarsinnaanissaat siunnersuutigaat.
Najukkami ataatsimiititaliaqarnissaq inatsisikkut nutaakkut, Inatsisartut ukiakkut ataatsimiinnerminni akuersissutigisaatigut periarfissaalerpoq, ilaasortat ajunngitsorsiassaqartinnissaat aqqutissiuunneqarluni. Kommuneqarfik Sermersooq kommunini siullersaalluni ataatsimiititalianik pilersitsisuuvoq.
Najukkami ataatsimiititaliani ilaasortat ajunngitsorsiassaat borgmesterip ajunngitsorsiarisartagaasa 1/12-iatut amerlatigaat, ukiumut 11.000 koruunit missaanniissallutik.
