Naja Arctica ajornatorsiortoq
Royal Arcticip umiarsuaataa Naja Arctica ippassaq taalimanngornermi Nuup talittarfianut apuutilerluni anoraasuamit tigusaqattaarneqarpoq talittarfik suli tikivinnagu inissinnerliorluni sarpiilu akornuserlutik.
Inunnik ajoqusertoqanngilaq, kisianni umiarsuaq ingerlaqqissinnaajunnaarallarpoq assartunikkullu kinguaattoorneqassaaq. Ingerlatsinermi pisortaq Taitsiánguaq Olsen ima oqaluttuarpoq, umiarsuaq talittarfimmut qanilliartortillugu anoraasuaqattaalersimasoq umiarsuullu naalagaata aqussinnaajunnarsimagaa. Taamaalilluni tippussaavoq sandkajimillu taagorneqartumut tipilluni. Tamanna sioqqullugu umiarsuup naalagaata anorip sakkortussusia aarlerinanngitsutut nalilersimavaa tassanngaannarli anoraasuariarujussuaqattaarsimavoq.
Aqqartartoq misissuisinneqarpoq umiarsuup naqqa, sarpii aqutaalu sukumiisumik misissorneqarlutik, maannamullu sarpii kisimik annerusumik ajoqusersimasut paasineqareerpoq tassa ulunneri ilanngartitersimagamik siggitsitersimallutillu, taamalu umiarsuup ingerlaqqinnissaa taamaatinneqarpoq.
Killisiuinerit tusarniaanerillu ataasinngorpat ingerlanneqarpata pisut qanoq ingerlasimanersut paasinarsissasut Taitsiánguaq Olsen oqarpoq.
Naja Arctica Sisimiunut ingerlaqqittussaagaluarpoq, kisianni usii Irene Arcticamit avannamukaattariaqassapput ullunik sisamanik kinguaattoorneqassalluni, kisianni eqqugaanerpaassapput nunatsinnit Danmarkimut nassiussassat Naja Arcticap ingerlassassaagalui, taakkulu ullunik qulinik kinguaattoorluni isumagineqassapput, ingerlassinermut pisortaq Taitsiánguaq Olsen oqarpoq.
Naja Arctic tallimanngormat unnukkut arfineq-pingasut missaanni ajutoorpoq aatsaallu aqqanernut talittarfimmi inissaminut inissinneqarluni, maannalu pissusissaatut usingiarneqarpoq aqqartartunit natermigut misissorneqaatigaluni. Taatsiannguaq Olsen
oqarpoq neriuutigalugu aqaguerseqqinnerusumik oqaaseqarsinnaassaluni, ataasinngorpallu suli sukimiinerusumik nalunaaruteqarsinnaalluni. Taatsinnguaq Olsenip qalleqqissarpaa ajutoorneq inuttut pikkorliornertut maannamut nalilinngikkitsik.
