Nuummi mittarfimmi timmisartunik aqutsinermut aaqqiissut iluaqutaassasoq
Trafikstyrelsip Nuummi Mittarfimmut killilersuutit nutaat sillimaniarnermut pitsanngorsaataasussat septembarip naanerani atuutilersitsinera Air Greenlandimut ilungersunartoqartitsingaatsiarpoq. Nuummi silaannakkut angallanneq ilungersunartorsiorfiusoq Trafikstyrelsimit nakkutilliinermi naliliisoqarmat killilersuutit atuutilersinneqarput.
Killersuinerit nutaat kingunerissavaat, Nuup mittarfiani akunnerup ataatsip ingerlanerani amerlanerpaamik sisamanik timmisartuussisoqarsinnaanngussasoq, amerlanerpaamik tikinnerit marluk aallarnerillu sisamat.
Tamanna Air Greenlandip nunatsinni timmisartuussiniarneranut ilungersunartorsiortitsivoq, aqqutimmi Nuuk qitiutillugu suliaapput. Taamaammat Air Greenland aamma Greenland Airports suleqatigiillutik aaqqiissutissarsiortariaqarput.
Silaannakkut siunissami angallannermut qularnarunnaarsitsissasoq
Nuummi Mittarfimmi timmisartunik aqutsineq marloqiusamik immikkoortulik TMA-mik taaneqartartoq aaqqiissutissaavoq. Tamanna Greenland Airportsip tusagassiuutinut tallimanngornermi nalunaarutaani allassimavoq.
Silaannakkut angallannerup nunamit timmisartunik aqutsisunit aqunneqartalernissaa timmisartullu minnerisa AFIS-imi sullissisunit isumagineqartalernissaa pineqarpoq.
AFIS-imi sulisut timmisartumik aquttunut paasissutissanik tunniussisarput, taakkuli napasuliamit timmisartunik nakkutiginninneq ajorput.
- Maannakkut aaqqiissutissaq angallannermi killilersuinernik kivitsisinnaasoq aamma Nuummi silaannakkut angallannermut siunissamut qulakkeernissaanut naammassilluinnalermat naammagisimaartorujussuuarput. TMA-modelip angalasunut amerleriartortunut iliuuseqarfiginissaannut pisariaqartunik pisinnaasaqartilissavaatigut isumannaatsuutissallutalu, aammalu sapaatit akunnerini aggersuni isumaqatigiissutip inissitsinnissaa qilanaaraarput, tassanilu amerlanerusunik nalunaaruteqassaagut, Greenland Airportsimi CEO, Jens Lauridsen tusagassiuutinut tallimanngornermi nalunaarummi oqarpoq.
Nuummi ullumikkut taamaallaat AFIS-imik sullissiveqarpoq. Tamanna Sermitsiap allaaseraa, tassanilu timmisartumi aquttut aalajangiinernik arlalinnik namminneerlutik aalajangiisariaqartarnerannik ilaqartoq nassuiaatigineqarpoq. Aaqqiissutilli nutaap tamanna allanngortinniarpaa.
Greenland Airportsip Naviarillu aaqqiissutissap nutaap pilersinneqarnissaa ingerlannissaalu pillugit isumaqatiginninniarneri naammassiartulerput. Taakku aaqqiissutip nutaap 2026-mi aasannginnerani atuutilernissaa naatsorsuutigaat Greenland Airports tusagassiuutinut nalunaarummi allappoq.
