Politiit 100-nit amerlanerusunit ullormi kingullermi nalunaaruteqarfigineqartut

Kalaallit Nunaanni Politiit Nuummi savimmik kapisisoqarneranut ilaatigut ornittariaqarsimasut ulloq kingulleq ulapingaatsiarsimapput.

Allattoq Ann-Sophie Greve Møller

decembarip 06-at 2025 13:15

Nutserisoq Connie Fontain

Politiit sulianut pisunullu tunngatillugu ullormi kingullermi nalunaarutiginninnernut 100-t sinnerlugit amerlassuseqartunut orniguttariaqarsimapput. Kalaallit Nunaanni Politiinit sillimasut pisortaat, Malik Olesen oqarpoq.

Pisut affaat sinnerlugit imigassartortoqarneranut attuumassuteqarput.

- Nalunaarutigineqartunit amerlasuut angerlarsimaffimmi eqqissisimanngitsoqarneranut, aqqusinermi perulluliornernut, imminut toqunnissamik siorasaaruteqarnernut, aalakoortunut imminut isumagisinnaanngitsunut tunngassuteqarput, Malik Olesen oqarpoq.

Savimmik kapisineq

Politiit Nuummi Nuussuarmi inissiami angutip savimmik kapineqarsimaneranut atatillugu tallimanngornermi ullaakkut qulingiluat missaanni orniguttariaqarsimapput.

Pisoq angutip arnallu akornanni pivoq.

Politiit pasineqartut tigusaraat, taannalu kingorna iperagaaqqippoq.

- Suliaq misissuiffigeqqissaarfigaarput, suliarlu toqutseriartoqarsimaneratut imaluunniit nakuusertoqarnerani suliatut suliarineqassanersoq misissuiffigaarput, Malik Olesen oqarpoq.

Angut pinerlineqartoq inuunerminik navianartorsiunngilaq.

Illit isummat pingaartittaqaarput. Nutaarsiassaq pillugu isorisat nersualaarinerillu uani tikilluaqquagut.