NAFGip Great Greenlandip unnerluutaa akerlilerpaa

- Taamaattoqanngilaq, soqanngilaq. - North Atlantic Fur Groupimi pisortaq Michael Nielsen, Sermitsiamut ullumi saqqummersumut taama oqarpoq.

Nunatta Ammerivia siusinnerusukkut suleqatigisimasaminut tassunga 31 millionit koruuninik piumasaqaateqareersorlu, Michael Nielsen taama oqarpoq.

Aningaasat ammeriviup sianiginngisaanik amminut tunineqarsimasunut, amminit tunisassianut ineriikkanut suli akilerneqanngitsunut, aamma ilaatigut erniat akilerneqarnissaannut piumasaqaatinut taarsiiviginneqqusissutinut matussutissaapput.

Illuatungeriit taakku marluk akunnerminni aningaasatigut sivisuumik aaqqiagiinngissuteqarneranni, millionilikkaanik akileeqqusineq maannamut sakkortunerpaartarigallarpaa. - Suliassaq Københavnimi isumaqatigiissitsiniarnikkut Sø- og Handelsrettenimi aalajangiiffigineqassaaq.

- Great Greenlandip aalajangiussimasaanut isumaqataanngilluinnarpugut aamma isumaqatigiissuteqarnikkut qulaajarneqarnissaa qilanaaraarput, Michael Nielsen Sermitsiamut oqarpoq.

Taassumali Nunatta Ammeriviata unnerluutiginnissutai ataasiakkaarlugit oqaaseqarfigerusunngilai. Taassuma innersuussutigai suleqatigiinnissamut isumaqatigiissumminni aalajangersakkat naapertorlugit aaqqiagiinngissutit inuit namminneq akunnerminni suliarinissaannut suli pituttugaammata.