Naatsorsueqqissaartarfik: Nunatsinni aningaasarsiorneq annikilleriarsimavoq suliffissarsiortullu ikileriarlutik
![](/sites/default/files/styles/image_934x467/public/article_images/arbejdsloeshed_0_0_1.jpg?itok=RuGbj6CP)
Nutaarsiassaq pitsaasoq tassaavoq, suliffissarsiorlutik nalunaarsimasut ukiormanna oktobarimi 3.278-ioriarlutik, siorna qaammammi tassani 3.422-ummata. Taamaalilluni suliffissarsiortut siornamut sanilliullugit 144-nik ikileriarsimallutik.
Tamatuma akerlianik Naatsorsueqqissaartarfiup aamma nalunaarutigaa, Nunatsinni aningaasarsiorneq ukiuni marlunni malittuinnarni ikileriarfiusimasoq. Naatsorsuinerit kingulliit takutippaat, Nunatsinni tunisat ataatsimut nalingat 2013-imi 1,9 procentinik ikileriarsimasut, tassa akit qaffakkiartornerat ilanngaatigereerlugu.
Nunatsinni tunisat ataatsimut nalingat 2012-imi aamma 0,3 procentinik ikileriaateqarpoq. Tassa taamaalilluni Nunatsinni aningaasarsiorneq ukiuni tulleriinni ikileriaateqarfiuvoq.