Naatsiiaat tamaviaarutigaat: Pisiniarfiit akikilliliinissartik isumaliutigaat

Kalaallit naatsiiaat salliunneqartariaqarput.

Nunatsinni imminut pilersorsinnaanerput taamaaliorsinnaannginnepullu pillugit arlalinnit oqariartuuteqartoqarnerata kiingorna allakkani ammasuni Naalakkersuisut taama oqariartuuteqarput,

Mariane Paviasen (IA) aamma Kommune Kujallermi borgmesteri Stine Egede (IA) kujataamiut nioqqutissaataannik atuineq pillugu upernaaq sakkortuumik uparuaapput. Naak pisiniarfiit nunap ilaaniittut naatsiianik amigaateqaraluartut, naatsiiat tonserpassuit eqqaavissuarmut ukiut tamaasa iginneqartarput.

Tamatuma kingorna imminut pilersornermut naalakkersuisoq Kalistat Lund (IA) naatsiiat pillugit naatitsisunut, amerlasunik tuniniaasartunut aamma niuertarfiit sinniisaannut Narsami workshopertitsivoq.

Naatsiiat ajortortaqarpallaarneri pillugit 2019-imi atuisunit pisiariumaneerupput maannalu ukkatarineqaqqilerput. 

Taamaakkaluartoq kalaallit naatsiiaat nioqqutissaavoq pitsassuaq tuniniarusunnartoq, Brugsenillu  akikillliliilluni tuniniaanissaminut piareersimasoq, pisortaq Susanne Christensen oqarpoq.

- Ussassaarutigalugu suliniuteqarfigisinnaalluarparput, kisianni nioqqutissat suulluunniit iluanaaruteqanngitsumik nioqqutiginngisaannarpagut, erseqqissaavoq. 

Naatsiiat akikillinissaat ilimagineqarsinnaavoq

Kalaallit naatsiaat pitsaassutsimik piumasaqaatinut naammassinnilluartutut maanna oqaatigineqarpoq. 

Brian Weuge Chemnitz, Pilersuisumi pisortaq taama naliliivoq. Taanna isumaqarpoq naatsiianik tuniniaaneq iluatsilluassappat attuumassuteqartut tamarmik, naatitsuniit tuninissunut Pilersuisoq ilanngullugu pilliuteqarlutik akikilliliisariaqartut. Aningaasarsiorfitsialaasariaqanngilaq, taanna oqarpoq. 

- Ungasissoq isigalugu imminut akilersinnaassappat, attuumassuteqartut ilaata ataasiinnaalluunniit niuernermi aningaasanik annaasaqarnissaa attanneqarsinnaanngilaq. 

- Annertunngitsunik suli unammilligassaqarpoq, pingaartumik inerititani siullerni. Qalipaat saalaarput, kisianni nalinginnaasumik kalaallit naatsiiaat mamarluinnarput, Brian Weuge Chemnitz oqarpoq.

Nerisassat nunatsinneersut ukkatarineqaleqqinnerat taassuma nuannaarutigaa. Atuisartullu naatsiarsersuleqqinnissaat anguniarlugu annertuumik tamamik kivitassaqartoq Pilersuisup pisinarfiisa pisortaata uparuarpaa. 

Pisisartut aalajangiisuupput

Brian Weuge Chemnitz nammineq tamaviaarussiniarpoq, taamalu Pilersuisoq kalaallit naatsiiaasa amerlanerusut tuninissaannut ilungersornerulerpoq. Brugseni aamma taamaliorniarpoq, qanittumilu Kalistat Lund oqaloqatigisimallugu.

- Kalaalit naatsiaat nittarsaaniarlugit annertuumik suliniuteqarniarpugut, Susanne Christensen oqarpoq. 

Naatsiiat ukiamut pisiniarfinnut annguppata nittarsaanneqarnerunerat pisisartunit malugineqarumaartoq taassuma ilanngullugu oqaatigaa. 

Kalallit naatsiaasa tunisaallualeqqinnissaanik ilimatsaassisinnaanerminik Susanne Christensen aperineqarami ima akivoq: 

- Apeqqutaalluinnarpoq akia pitsaassusaalu naapertuunnersut atuisartullu suut piumaneraat, taakkuuppummi pisiassanik toqqagassaatitsinnik aalajangiisuusartut.

Naatsiiat siulliit naatitsisartunit ataasiakkaanit pisiarereeritsik Susanne Christensenip oqaatigaa.