Naatitat tapiiffigilersaanngilaat
Siumumeersumit Malik Berthelsenimit kajumissaarneqarluni pineqartumut naalakkersuinikkut akisussaasup taassuma neriorsuutigaa, KNI-mut sullissinissamik nutaamik isumaqatigiinniarnernut atatillugu qanoq iliorluni nioqqutissat pisariaqartinneqartut, Inuussutissalerinermut Siunnersuisoqatigiit peqqinnarnerusunik nerisaqarnissamut inassuteqaataannik annerusumik naammassinniffiusinnaasut misissuiffigineqassasut.
- Taamaalilluni isorliunerusuni nunaqarfinnilu najugallit, inuussutissanik peqqinnartunik pissarsisinnaanissaat ullumikkornit ajornannginnerulerniassammat, Jens B. Frederiksen erseqqissaavoq.
Taamaattorli paarnanik naatitanillu pisiortornerulernermik kinguneqartussanik, akinik appaanissamut atugassanik aningaasaliisoqarnavianngilaq. Taamatut aningaasaliinissaq periarfissaqanngilaq, aamma nunaqarfimmiut illoqarfimmiullu immikkoortinneqarnissaat kissaatigineqanngilaq, Jens B. Frederiksen Siumumeersup Malik Berthelsenip kissaataanut itigartitsilluni taama allappoq.
- Aamma isumaqarpunga, illoqarfinni ilaqutariit isertitakitsut paarnanik naatitanillu, karrinit tunisassianik pisinngitsoortartut. Imaanngitsoq peqqinnartumik inoorusunnginnamik, kisiannili akissaqannginnertik pissutigalugu, Jens B. Frederiksen tunngavilersuivoq.
Naalakkersuisut tassa taamaalillutik Pilersuisup pisiniarfiini paarnat naatitallu akii appartikkusunngilaat, illoqarfimmiut taamatut periarfissinneqartussaanngimmata.
Pilersuisumit piginnittunut tassa Namminersorlutik Oqartussanut sullissinissamik isumaqatigiissusiornissamut atatillugu pisiassat ikinnerulersinneqarnissaat ammasarfiillu sivikillineqarnissaat piumasaqaatissatut ilimasaarutigineqareerpoq.
