Atorfillit kattuffiat Naalakkersuisut toqqissisimatinngilaatigut
Suliffinnik Nuummiit illoqarfinnut allanut nuussuisoqarsinnaanera pillugu Naalakkersuisut qanoq aalajangigaqarpat?
Naalakkersuisut siulittaasuat, Siumup siulittaasuat Kim Kielsen, naalakkersuisuneeqataalu, Inuit Ataqatigiit Siulittaasuat Sara Olsvig tamatumunnga assigiinngitsunik akipput.
Naalakkersuisut sapaatit akunnerani kingullermi ataatsimiimata ataatsimoorussamik erseqqissumik akissutissaqalinngillat.
Taamaanneralu Atorfillit kattuffiannik toqqissisimajunaarsitsivoq.
- Ajornerulersinnaanera soorlu maani ilinniarnermi sorpassuit qanillugit inissisimammat, taavalu ilisimatusarfimmiinnerani aamma makku ilisimatusartut taakku suleqatigineqarmata, Atorfillit kattuffianni siulittaasoq Dina Olsen taama oqarpoq.
Ilinniarfiit suliffiillu nuunnertussatut eqqarsaatigineqartut naalakkersuisoqarfimmiit suli ilisimatinneqaratillu tusarniarfigineqarsimanngitsut atorfillit kattuffianni siulittaasoq erseqqissaavoq.
Taamaamma naapillugit aqagu oqaloqatiginiarlugit pilersaarutigaa.
- Tusarniutinik aamma tusarnikuunngiivippugut, tigusaqarnikuunngilagut aamma ilinniartoqarfinni aamma taamaattoqarpasinngilaq tassa periusiusussaagaluaq tusarniaaqqaartarneq, Dina Olsen taama oqarpoq.
