Pingajussaanik iluatsinneqartoq: Naalakkersuisut tarnikkut nappaatilinnut katsorsaavissaq misileqqinniarpaat
Siullermik suliariumannittussarsiuussineq ingerlanngimmat suliniut iluatsinngilaq.
Aappaassaanik suliariumannittuuniartut naammanngillat.
Maannali iluatsittoqassaaq. Inatsisartunimi Aningaasaqarnermut Akileraartarnermullu ataatsimiititaliap suliniutip pilersaarusiorneqarnissaa Nuummilu tarnikkut nappaatilinnut katsorsaaviup nutaap suliariumannittussarsiuunneqarnissaa pingajussaanik akuersissutigaa. Ineqarnermut attaveqaasersuutinullu naalakkersuisoqarfik tallimanngornermi tusagassiuutinut nalunaaruteqarpoq.
- Neqeroortitseqqissinnaalernerput qilanaaraara, neqeroortitsinermilu angusarissaarluta neqeroortitsineq naammassisinnaassallutigu neriuutigalugu. Tarnikkut nappaatilinnik katsorsaasarnermi pisariaqartitat iliuuseqarfigalugit, pilersaarullu neqeroorfigissallugu pilerinarsarniarlugu pilersaarut neqeroortitseriaaserlu naleqqussarsimavagut, ineqarnermut attaveqaasersuutinullu naalakkersuisoq, Erik Jensen (S) oqarpoq.
Naallu misiliinerpassuugaluartut Peqqissutsimut naalakkersuisoq, Mimi Karlsen (IA) aamma nuannaarpoq:
- Pilersaarut tarnikkut nappaatilinnut katsorsaavik nutaaq piffissami sivisuumi sulissutigineqarsimagaluartoq, maanna alloriaqqissinnaagatta, tarnikkullu nappaatilinnik katsorsaanermi ullutsinni pisariaqartitanut, siunissamilu pisariaqartinneqarumaartussanut aaqqiisinnaasorisatsinnik maanna pilersaaruteqarnerput nuannaarutigaara, taanna oqarpoq.
Ineqarnermut attaveqaasersuutinullu naalakkersuisoqarfiup oqarnera naapertorlugu suliniummut atatillugu nipaatsumik neriuuteqarneq tamatumuuna tamakkiisumik suliassatut siusissumik neqeroortittssitigalugu misiligarniarneqarneranik pissuteqarpoq.
Dronning Ingridip Napparsimmavissuanut oqilisaataassasoq
Ineqarnermut attaveqaasersuutinullu naalakkersuisoqarfiup oqarnera naapertorlugu tarnikkut nappaatilinnut katsorsaavissami nutaami inissat qulinik amerlineqassapput, taamaalilluni inissat katillugit 22-ulissallutik. Inissaq marlunnik qulereeqassaaq, tamatumalu saniatigut napparsimmaviup sinnerata qalipaataata assinganik sungaartumik aappalaartumillu qalipaaserneqassalluni.
Tamatuma saniatigut tarnikkut nappaatilinnut katsorsaavissap nutaap meeqqanut matoqqasumik immikkoortortaqarfeqarnissaa pilersaarutaavoq.
Naalakkersuisut tarnikkut nappaatilinnut katsorsaavimmik nutaamik taamaallaat kissaateqanngillat. Suliariumannittussarsiuussinermimi tarnikkut nappaatilinnut katsorsaaviup ilassutaatut ambulancenut isaavissamik, portørinullu centerissamik sanaartortoqarnissaa aamma ilaapput.
Tarnikkut nappaatilinnut katsorsaaviup pitsanngorsaavigineqarnissaa pisariaqarluinnarpoq. Peqqinnissaq pillugu ataatsimiititaliarsuup isumaliutissiissut utaqqineqartuarsimassoq maajimi saqqummiukkamiuk tarnikkut nappaatilinnut katsorsaaneq pillugu ima allaaserineqarpoq:
- DIH-imi tarnikkut nappaatilinnut illu mikivallaalersimavoq tulluanngitsumillu aaqqissugaalluni. Napparsimasut assigiinngitsut avissaarteqqasussaagaluartut akulerunneqarsimapput, ilaatigut meeqqat napparsimasullu allat sanngiitsut. Tamatuma suliffimmi avatangiisit tamaviaartippai sulisunullu persuttaanerit siorasaarinerillu amerlassusaat qaffallutik napparsimasullu allat toqqissisimajunnaartillugit.
