Meeqqanut, inuusuttunut ilaqutariinnullu Naalakkersuisup, Mimi Karlsenip danskit ministeriat suleqatini spiralilersuisoqarsimanera pillugu ataatsimeeqatiginiaraa.Assi: KNR

Naalakkersuisut spiralilersuineq pillugu qulaajaatitsiniartut: Danmark ataatsimeeqatiginiaraat

Spiralilersuisoqarsimanera nunatsinni politikkikkut aalassassimaartitsivoq. Naalakkersuisut danskit peqqinnissamut ministeriat ataatsimeeqatiginiarpaat.

Naligiissitaanermut naalakkersuisoq, Naaja Nathanielsen (IA) nalunaaruteqareerpoq.

Naleqqap siulittaasua, Hans Enoksen aamma assinganik oqaaseqarpoq.

Kalaallillu folketingimut ilaasortat ersarissumik aamma nalunaaruteqarput: Spiralilersuisoqarnissaanut pisunik misissuisoqassaaq.

Tusarnaagassiaq Spiralkampagnen
 

  • Danskit oqartussaasui kalaallit amerliartoqqunagit spiralilersuinissaminnut inassuteqarsimasut, DR-ip podcastimik tusarnaagassiliareqqammisaani erserpoq.
  • 1966-ip 1975-illu akornanni kalaallit niviarsiaqqat tuusintilikkaat spiralilersinneqarput.
  • 1966-ip 1970-illu akornanni spiralilersinneqartut 4.500-upput.
  • Kalaallit Nunaanni arnat naartusinnaasut taamani 9000-upput.
  • Aperineqaqqaaratik spiralilersinneqarsimasuni arlallit tarnikkut timikkullu kingunerlutsitserujussuarnerannik kinguneqartumik qinigassinneqarsimanngitsutut misigisimapput. Anniaatigalugulu kingunerluutigisimagaat arlallit oqarput.
  • Niviarsiaqqanut ukiukitsunut, angajoqqaavi akuersiteqqaarnagit, spiralilersuineq danskit suliniuteqaleruttorneranni inatsisitigut akuerisaanngilaq. Taamaammat nakorsat naartunaveersaatinik niviarsiaqqanut 18-iliineqanngitsunut, angajoqqaavi akuersiteqqaarnagit, siunnersuisinnaalersillugit inatsit allanngortinneqarpoq. Tamanna nakorsat niviarsiaqqanut ukiukitsunut, angajoqqaavi akuersiteqqaarnagit, spiralileeqqusaanertut paasisimavaat. Tassa imaappoq, nakorsat inatsisinik unioqqutitsisimapput.
  • "Spiralkampagnen" P1-ikkut maajip ulluisa arfineq-pingajuanniit tusarnaarneqarsinnaalissaaq.

    Tusarfik: DR-podcast "Spiralkampagnen"

Naalakkersuisut ataatsimoorlutik manna nalunaaruteqarput: Qulaajaasoqassaaq. Meeqqanut, inuusuttunut ilaqutariinnullu Naalakkersuisoq, Mimi Karlsen ima oqarpoq:

- Suliamut tunngassuteqarsinnaasut tamarmik saqqummiunneqarniassammata Naalakkersuisunit qulaajaasoqarnissaa tapersersorneqarpoq. Tamanna tunngavigalugu danskit peqqinnissakkut ministeriat Magnus Heunicke, siunissami suliniutissat isumaqatigiissutiginissaat anguniarlugu piffissami qanittumi ataatsimeeqatiginissaa anguniarlugu saaffigissamaarpara.

- Peqqinnissaqarfik 1992-imi januaarip aallaqqaataani akisussaaffigilerparput taassumallu tungaanut danskit akisussaaffiginikuuaat. Taamaattumik spiralilersuisimanermut tunngasumut paasissutissaatigut annikitsuararsuupput.

Qulaajaaneq qanoq imaqassanersoq – kinalu qulaajaasuussanersoq, Mimi Karlsenip oqaaseqarfiginngilaa.

KNR-ip taanna apersorniarsaraa. Aamma danskit peqqinnissamut ministeriat, Magnus Heunicke oqaaseqartinniarsaaraarput.

4500-it spiralilerneqartut

DR-ip tusarnaagassiaata tallimanik immikkoortullip 1966-imit 1970-ikkut qiteqqunnerannut kalaallit niviarsiaqqat arnallu qanoq spiralilersortittarsimanerat oqaluttuaraa.

1966-imit 1970-imut spiralit 4500-it ikkunneqarput. Nunatsinni piffissami tassani arnat meerartaarsinnaasut  9000-iupput.

AAMMA ATUARUK Politikerit spiralilersuineq pillugu: Tupannarpoq, naakkittaappoq annilaarnarlunilu

Kalaallit Nunaanni inuiaqatigiit amerliartortut ikilisinnissaat pisortatigoortumik siunertarineqarpoq. Danskimmi oqartussaasuisa arnat, 20-t ataallugit ukioqartut uersakkanik meeraqartut amerlavallaarnerat ernumassutigisimavaat.

Tamatuma saniatigut inuiaqatigiit amerliartornerat Kalaallit Nunaata nutaanngorsarneranut unammillernartoqartitsivoq, tamannalu danskit naalagaaffiata aallaqqaammut naatsorsuutigisaanit akisuneruleriartorluni.

 

 

Naja Lyberthip spiralilersissimanini qanoq kingunerluutigisimanerlugu nunatsinni siulliulluni tamanut oqaluttuaraa.

- Taamani atoqateqarnikuunngisaannarlunga spiralilerneqarama anniartupilussuuvunga. Taamani putuneqarpunga. Spiralilerneqarama soorlu savinnik illissakkut kapoorneqarlunga. Tamannalu ukiorpassuarni aaqarnerluttarninnik kinguneqarpoq, Naja Lyberth 14-inik ukioqarluni spiralilersissimasoq oqarpoq.

Tusaanngamut sianerit

Inatsit naapertorlugu nunatsinni peqqinnissaqarfiup nakorsiat naleqassusaat, innarligassaannginnerat namminerlu aalajangiisinnaatitaanerat ataqqillugit suliaqartarpoq. Katsorsaanerit napparsimasup ilisimatinneqarsimasup akuersinnginneratigut aallartinneqarsinnaanatillu ingerlateqqinneqarsinnaanngillat.

Naalakkersuisut oqarnerat naapertorlugu spiralilersortissimasunut ilaasimaguit Tusaanngamut sianersinnaavutit.

Tusaannga oqarasuaammut 80 11 80-imut imaluunniit sms-ikkut: 18 99-imut sapaammit sisamanngornermut 9:00-imit 00:00-imut aamma tallimanngornermit 09:00-imit 04:00-imut attavigisinnaavat.

Oqaloqatigiinneq illit siunnersuisullu akornanni kinaassutsimik isertuussisumik oqaloqatigiinneruvoq.



Nutaarsiassaateqarpit?

Nutaarsiassaateqarpit?

1717-imut SMS-erit, UNNIA allariarlugu kingornalu oqaluttuat allallugu.

Immersuivik atorlugu allaffigitigut knr.gl/1717

Emailikkulluunniit 1717@knr.gl