Politikki

Allaffissorneq oqinnerusoq, akiuussutissat persuttaasarnermillu akiuiniarneq

Inuussutissarsiornerup iluani allaffissorneq nutaaliaanerusoq, qimmit tamarmik akiuussutissamik kapisitittarnissaat, inatsisaattuliornermillu unitsitsiniarneq. Naalakkersuisut Inatsisartut ukiakkut ataatsimiinnissaannut siunnersuutaat ilaatigut tamakkuupput.

Foto: Nils Baum, Bureau for Inatsisartut

Allattoq Ivik Kristiansen

aggustip 30-at 2016 13:08

Ukiakkut ataatsimiinnerup qaammatini marlunni sinnilaarlugit ingerlanneqarnissaa pilersaarutaavoq, septembarillu ulluisa 16-ianni aallartissalluni.

Politikerillu 82-inik oqaluuserisassaqarput, taakkunannga 28-t Naalakkersuisunit oqaluuserisassanngortinneqarlutik.

Iinuussutissarsiornermut, suliffeqarnermut niuernermullu naalakkersuisup, Vittus Qujaukitsup Nunatsinni inuussutissarsiornermi allaffissornikkut oqilisaanissaq anguniarlugu siunnersuutai oqaluuserisassanut ilaapput. Inatsisartullu taakkununnga akuersissappata avataaniit aningaasaliisussarsiornissaq sapernannginnerulissasoq, Qujaukitsoq isumaqarpoq.

Aamma atuaruk Inatsisartut ukiaanerani ataatsimiinnissaat qallisoq

Nunatta inuussutissarsiornerata iluani inatsisinik allannguuteqarnikkut nutarterinikkullu allaffissornemi oqilisaasoqassasoq Qujaikitsoq isumaqarpoq, naatsorsuuserinermullu ukiumoortumillu naatsorsuusiortarnermut inatsisit allannguuteqarnissaq siunnersuutigalugu. Aamma Nunatsinni suliffeqarfiit Qitiusumik suliffeqarfinnik Nalunaarsuiffimmi nalunaarsorneqartalernissaat siunnersuutigaa.

Qimmit akiuussutissamik kapitittarnissaat pisussaaffiussasoq

Tamatuma saniatigut qimmit tamarmik qimmit nappaataannut akiuussutissamik kapitittarnissaasa inatsisitigut pisussaaffinngortinnissaa aalisarnermut, piniarnermut nunalerinermullu naalakkersuisup Nikolaj Jeremiassenip siunnersuutigaa. Avannaani qimmit ukiup aallartinnerani napparsimallutik toqurarput, assinganillu pisoqannginnissaa anguniarlugu Jeremiassen taama siunnersuuteqarpoq.

Aamma atuaruk Pinngitsaaliissummik kapineqartalernissaat siunnersuutigineqalerpoq

Siunnersuutaalu akuerineqassappat, qimmit qimuttut, savaatillillu qimmiisa akiuussutissamik kapinneqarnissaat Namminersorlutik Oqartussat akilissavaat. Qimmilli allat kapitinnissaat qimmillit akilissavaat.

Palleeqqusinnginneq, sumiiffimmeeqqusinnginneq peersitaanerlu

Inatsisinik atuutsitsinermut naalakkersuisup Martha Lund Olsenip persuttagaasimasut isumannaatsuunissaat isumaginiarpaa, inuillu aalajangersimasut inunnut allanut attaveqarnissaat, aalajangersimasumilu sumiiffimmiissinnaanissaat inerteqqutaasinnaalernissaannik inullu persuttaasimasup ataatsimoorluni angerlarsimaffimmit peersinneqarsinnaalernissaanik siunnersuutigaa.

Aamma isertitsivinni sulisut ajornartoorfimmi qasilitsumik seqqarsaatinik eqqornaveeqqutinillu atuisinnaalernissaat, Martha Lund Olsenip siunnersuutimini ilannguppai.