Naalakkersuisut: Sapaatip akunnera pujortanngiffik tikilluaqqunaqaaq
![](/sites/default/files/styles/image_934x467/public/article_images/pc150003_2.jpg?itok=Q0YfN4hf)
Nunatsinni innutaasuni inersimasut affaat sinningaatsiarlugit pujortartartuupput aammalu meeqqat inuusuttullu pujortartaliaartartut amerliartulaarlutik.
Maanna Siumumeersoq Hans Enoksens siunnersuuteqarpoq sapaatip akunneranik pujortarfiunngitsumik pisoqartalertariaqartoq, sapaatip akunnerani imigassartornaversaarfiusumik pisoqartarneranut assigusumik. Naalakkersuisut siunnersuut ilalerpaat, taamaattoq nassuerutigaat qularutigisariaqartoq pujortartartut tamarmik pujortanngiffimmik ataqqinninnissaat.
- Naalakkersuisut nalilerpaat, piviusorsiortuunngitsoq “Sapaatip akunneranik pujortarnaveersaarfim-mik” pujortarfioqqusaanngitsunik ingerlatsinissaq. Kisiannili sapaatip akunnera 18 assigalugu, “Sapaatip akunnera pujortarnaveersaarfik” periarfissatsialaavoq pineqartumi oqallinnerup paasisitsiniaanerullu annertusineqarnissaanu, peqqissutsimut naalakkersuisoq Agathe Fontain akissummini allappoq.
Naalakkersuisut erseqqissarpaat pujortartarneq akiorniarlugu suliniutit sunniuteqariartulernissaat neriunartoq. Innuttaasut peqqissuunissaannik suliniut "Inuuneritta" aqqutigalugu arlalinnik iliuuseqartoqarpoq.
Unammisitsisarnermi "Atuaqatigiiit pujortartartuunngitsut"-mi ukiut tamaasa unammisitsisoqarnissaani meeqqat inuusuttullu namminneerlutik isummersortarput pujortartarnerup qanoq akiorneqarsinnaaneranut.