Naalakkersuisut Qeqertarsuatsiaat eqqaanni aatsitassarsiulersaarnermi nikeriatsiarneq akuerigaat
Naalakkersuisut Qeqertarsuatsiaat eqqaanni aatsitassarsiulersaartut aallartinissarnissaat akueraat.
Naalakkersuisummi Greenland Anorthosite Miningip Qeqertarsuatsiaat eqqaanni aattsitassarsiulersaarlutik aallartinissarnerani nikeriarneq siulleq akueraat. Greenland Anorthosite Miningimmi ASN-iliornissaa IPN-iliornissaalu akuerineqarpoq.
ASN avatangiisinut sunniutaasinnaasunik naliliinermut naalisaataavoq. Tassa aatsitassarsioqatigiiffik suliniut avatangiisinut qanoq sunniuteqarsinnaaneranik nassuiaatitalimmik nalunaarusiorsimasussaavoq. Taassuminngalu nalunaarusiornissaa Naalakkersuisunit akuerineqaqqammerpoq.
Anorthosit suua?
Anorthosit ujaraavoq qaqortoq.
Nunani assigiinngitsorpassuarni glasfiberiliornermi, cementiliornermi, qalipaasiornermi aluminiumiliornermilu akorineqartarpoq.
Qeqertarsuatsiaat eqqaanni 22 millionit tonsit missaannik sivikinnerpaamik ukiuni 25-ni qallorneqarsinnaasumik anorthositeqartoq, aatsitassarsioqatigiiffiup Greenland Anorthosite Miningip paasinikuuaa.
Tusarfik: Altinget Arktis
IPN inuiaqatigiinni piujuaannartitsisumik ingerlatsinermik naliliinermut naalisaataavoq. Tassa aatsitassarsioqatigiiffik suliniutip inuiaqatigiinnut qanoq sunniuteqarsinnaaneranik nassuiaatitalimmik nalunaarusiorsimasussaavoq. Aamma taassuminnga nalunaarusiornissaa Naalakkersuisunit akuerineqaqqammerpoq.
Missingersuusiatullu nalunaarusiai marluk taakkua ukiaru tusarniaassutigineqassapput. Kikkulluunniit aatsitassarsiulersaarnermut tassunga soqutigisallit oqaaseqaateqarsinnaapput.
Qinnuteqaaserineq sivisussasoq
Oqaaseqaatit tamarmik nalunaarusiornikkut qulaajarneqarlutillu akineqassapput.
Nalunaarusiat tusarniaassutigineqareerpata suliniummut tassunga oqaaseqaatit tamarmik allaaserineqassapput. Tassa suliniutip tusarniaassutigineqarnerani oqaaseqaatit tamarmik nalunaarusiarineqassapput.
AAMMA ATUARUK Aatsitassarsiornissamut suliniut Vækstfondenimit Greenland Ventureimiillu aningaasaliiffigineqartoq
Taamaaliortoqareerpat oqaaseqaatit pillugit nalunaarusiaq missiliussatullu ASN-iliaq Namminersorlutik Oqartussat Aatsitassanik Suliassaqarfinnut Avatangiisinut Aqutsisoqarfianit (ASAA) taassumalu siunnersortaanit immikkut ilisimasaliusunit qulaajarneqassaaq.
Tamatuma kingorna tusarniaassutigineqaqqissallunilu illoqarfinni nunaqarfinnilu innuttaasunik aatsitassarsiornermit sunnerneqarsinnaasunik tusarniaalluni ataatsimiisitsisoqassaaq.
Taamaaliortoqareerpat ASN-iliassatut missingiut oqaaseqaatillu pillugit nalunaarusiaq Naalakkersuisunut suliassanngortinneqassapput.
ASN-iliassatut missingiut oqaaseqaatillu pillugit nalunaarusiaq Naalakkersuisunit akuerineqarpata, inaarutaasumik aaqqissukkamillu ASN-iliortoqarsinnaalissaaq. Aatsitassarsioqatigiiffik taamaalilluni piiaanissamut qinnuteqarsinnaanngussaaq.
Naalakkersuisoq Qeqertarsuatsiaanukassangasoq
Suliniut tusarniaassutigineqarpat, Naalakkersuisut suliniummik taassuminnga akuersinerattut paasisariaqanngilaq. Tamannami aatsitassarsioqatigiiffillu atsioqatigiinnertalimmik isumaqatigiissuteqarpata aatsaat pissaaq.
Aatsitassanut inatsisilerinermullu naalakkersuisoq, Aqqaluaq B. Egede (IA), tusagassiutinut ima nalunaarpoq:
- Nunatsinni aatsitassarsiornermi suliassani nunami namminermi najukkamilu piujuartitsiviusumik ineriartortitsinerup qulakkeernissaata ukkatarilluarnissaa pingaartippara. Inui tusaaniarlugit ilinniarfiginiarlugillu qanittukkut Qeqertarsuatsiaanukassangavunga, aatsitassanut naalakkersuisoq Aqqaluaq B. Egede oqarpoq.
Anorthositimik Kangerlussuarmi maanna piiaaffeqareerpoq, piiavillu taanna Hudson Resources’ White Mountainimik ateqarpoq.
