Anorthosit aatsitassaavoq glasfiberinik alumiiniumimillu tunisassiornermi atorneqarsinnaavoq.Assi: Greenland Anorthosite Resources

Aatsitassarsiornissamut suliniut Vækstfondenimit Greenland Ventureimiillu aningaasaliiffigineqartoq

Aningaasaateqarfiit marluk Nuup kujataani anorthositenik piiaalernissamut aningaasaliipput. Greenland Anorthosite Resoucesip pisortaata sulilernissaq qilanaaraa.

Aningaasaateqarfiit nutaat marluk, Vækstfonden aamma Greenland Venture Nuup kujataatungaani Qeqertarsuatsiaat eqqaani aatsitassarisiornissamut suliniut siunissarissaartutut isigaat.

Taamaammat aningaasaateqarfiit taakkua marluk Greenland Anorthosite Resourcesimut tamaani aatsitassanik piiaaniartumut aningaasaliiniarlutik aalajangerput.

Aningaasaateqarfiit tusagassiuutinut nalunaarummi taama paasissutissiipput.

- Anorthosit aatsitassaavoq atorluarneqarsinnaasoq avatangiisinullu iluaqutissartaqartut, Vækstfondenip aningaasaliissussisarnermi pisortaa, Heidi Haurholm-Rasmussen tusagassiuutinut nalunaarummi oqarpoq

- Greenland Anorthosite Resourcesip aatsitassarsiorfissaani misissuinerit siulliit pitsaassutsikkut amerlassutsikkullu neriulluarnartumik takutitsipput, Heidi Haurholm-Rasmussen oqarpoq.

Anorthosit aatsitassaavoq glasfiberinik alumiiniumimillu tunisassiornermi atorneqarsinnaavoq.

Vækstfonden: Aatsitassarsiorsiorneq suliffissaqartitsissasoq

Vækstfonden aamma Greenland Venture nunatsinni aatsitassarsiornernut siusinnerusukkut aningaasaleereernikuuvoq, aatsitassarsiornissamillu suliniutip allap aningaasaateqarfimmit aningaasat maanna tassa aamma nuannaarutigisinnaavai.

- Aatsitassanik piiaaneq aatsitassarsiornerlu kalaallit aningaasarsiorneranni qitiuvoq, Greenland Ventureilu ataatsimoorluta Kalaallit Nunaanni aatsitassarsiornermik suliniummut, ukiuni aggersuni suliffissaqartitsilluartussatut neriunaateqartumut aningaasaleeqatigeeqqissinnaanerput nuannaarutigaarput, Heidi Haurholm-Rasmussen oqarpoq.

Nuup kujatani anorthositinik piiaaffissaq nuna qaani ammasuussasoq pilersaarutaavoq. Pilersaarut malillugu aatsitassarsiorneq ukiut pingasut qaangiuppata aallartinneqassaaq.

Aatsitassarsiorniartut misissuinermik suliaqarnertik naammassivaat nassaassaqarluartorlu paasillugu.

Piginneqatigiiffik taava suliniutip avatangiisinut inuiaqatigiinnullu qanoq sunniuteqarsinnaaneranik naliliinermut  missinngersuusiussaaq, taakkualu Aatsitassarsiornermik Naalakkersuisoqarfiup akuerisissasai, aatsitassarsiulerrnissamut akuersissutisinissamut tunngaviliisuussapput.

Nunarsuarmi annerpaallunilu pitsaanerpaasoq

Greenland Anorthosite Resourcesip pisortaata aningaasaateqarfiit marluk aningaasaliinerat nuannaarutigaa, anorthositemillu piiaanerup aallartinnissaa qilanaaralugu.

- Vækstfondenip aamma Greenland Ventureip neriunaateqartup ineriartortinnissaanut suleqatiginerat nuannaarutigeqaarput.

- Itisuumut qillerillilluta misissuinitta takutippaa isumalluutit nunarsuarmi anorthositini pitsaanerpaallutillu anginerpaasinnaasut, Greenland Anorthosit Resourcesip pisortaanera, Claus Stoltenborg oqarpoq.

Greenland Venturep Vækstfondillu ingerlatseqatigiiffimmut piginneqatigiissutit 3 procentii aallaqqaammut pisiaraat, tassalu ataatsimoorlutik 6 procentiuteqarlutik.

- Suliniut Greenland Venturep Vækstfondenillu immikkut 1,5 millionit koruuninik aningaasaliiffigisaat aallartisaleruttorpoq. Suliniutip ineriartortinneqarnera ilutigalugu aningaasaliisoqarnerunissaata pisariaqartinneqaleriartornerani Greenland Ventureip Vækstfondenillu piginneqatigiissuteqassusiat aalajangiusimaannarumallugu aningaasaliissutit qaffannissaat naatsorsuutigineqarpoq, Jan Boman aningaasaliisut sinnerlugit oqarpoq.

Hudson Resourcesip Nunatta avannaatungaani Kangerlussuarmi anorthositinik piiaaveqareerpoq, suliniut White Mountain, taannalu Greenland Ventureip aamma aningaasaliiffiginikuuaa.

Danskit aningaasaateqarfiata, Vækstfondenip aamma Greenland Venture A/S-ip Bluejay Miningsip nunatta avannaani suliniutaa 35 millionit koruunit missaannik ukiaq aningaasaliiffigaat.

Isummersuutit



Nutaarsiassaateqarpit?

Nutaarsiassaateqarpit?

1717-imut SMS-erit, UNNIA allariarlugu kingornalu oqaluttuat allallugu.

Immersuivik atorlugu allaffigitigut knr.gl/1717

Emailikkulluunniit 1717@knr.gl

KNR TV: TekstTV-mi paasissutissat

TTV q 110 Ullut tamaasa nutaarsiassat

TTV q 400 Timmisartuutinissat
aallartussat tikitussallu

TTV q 300 Tv-kkut aallakaatitassat
tulleriiarnerat

TTV q 300 radiukkut allakaatitassat
tulleriiarnerat