Naalakkersuisut naveertipput
Nuummi Atuarfik Hans Lyngep atuarfiani kigutileriffiliornissamut aningaasaliissutit 6 millioner koruuninik ilanngarneqassasut december 2010-mi Naalakkersuisut qinnutigaat. Maanna aningaasat taakku amerlaqataannik aningaasaliissutit qaffanneqassasut Naalakkersuisut qinnutigaat. Tamanna aqutsinerlunnerusoq aningaasaqarnermut ataatsimiititaliaq isumaqarpoq.
Nuummi atuarfiit nutaajunersaat Atuarfik Hans Lynge kigutileriffittaartussanngorpoq. Taama pisoqartussaajunnaarlugu siusinnerusukkut isummertoqaraluarpoq, maannali tassa Naalakkersuisut isumaqalerput kigutileriffiliortoqartariaqartoq.
Atuarfik Hans Lynge sananeqartussanngormat pilersaarutini siullerni allassimagaluarpoq kigutileriffik ilaatinneqassasoq siunertamut 8 millioner koruunit atorneqassasut pilersaarutaalluni. Naalakkersuisulli december 2010 aningaasaqarnermut ataatsimiititaliamut qinnuteqarput suliamut aningaasaliissutit 6 millioner koruuninik ilanngarneqassasut. Taamaattumik aningaasaqarnermut ataatsimiititaliami tupigusuutigineqarpoq maanna Naalakkersuisut qinnutigimmassuk aningaasaliissutit 6 millioner koruuninik ilaneqassasut.
- Qinngutsinni kigutileriffimmut tunngasup ingerlasimanera pakatsissutigalugu ataatsimiititaliap oqaatigissavaa. Pilersaarutaaqqaartutut Qinngutsinni atuarfiup sananeqarneranut atatillugu kigutileriffiliortoqarpat akikinnerusimassagaluarpoq, aningaasaqarnermut ataatsimiititaliat tallimanngorneq augustip 19-at ataatsimiinnerminit imaqarniliamini allappoq.
- Pilersaarummut tunngatillugu aningaasaliissutinik aqutsineq siunissami pilersaarutaasartussat eqqarsaatigalugit annertuumik eqqarsaatissinneqarnermik kinguneqartariaqarpoq, aningaasaqarnermut ataatsimiititaliaq isornartorsiuivoq.
Taamaattoq aningaasat qinnutigineqartut 6 millioner koruunit akuerineqarput allanut aningaasaliissutareersunik nuutitsinikkut.
