Naalakkersuisut mammografi misissulerpaat

Taamaattorli Agathe Fontainip oqaatigaa, iviangikkut qinnguartaalluni misissuisarnerup, soorlu Neriuffimmit kissaatigineqartutut ittup, piviusunngortinniarnissaa ajornakusuussaqisoq - tassa aningaasaqarniarneq suliassartaalu eqqarsaatigalugit.

Naalakkersuisunut ilaasortap erseqqissarpaa, iviangikkut kræfteqalersinnaanermut misissuinerup katsorsaanissat allat akissaarullugit salliutinneqalinnginnissaa pingaartuusoq.

Agathe Fontainip innersuussutigaa, Nunatsinni arnat iviangimikkut kræfteqartut ukiumut paasineqartartut maannakkut 15-it missiliormatigik.

- Danmarkimisut misissuisaleraluarutta, tassa arnat 50-ileereersimasut ukioq ataaseq allortarlugu qinnguartartillutik iviangiminnik misissortittalissappata, taava arnat ukiumut 3.500-t qinnguartartillutik misissorneqartarnissaat neqeroorutigissagaluarparput. Taakkulu 20 procentiinnaat Nuummi najugaqarput. Sinnerilu 80 procentit misissortikkiartorlutik Nuummukartariaqartassallutik. Tamatuma kinguneranik angalanernut aningaasartuuterpassuussapput. Tamatumalu peqatigisaanik misissuinerpassuit tamakkua isumaginissaannut pilersaarusiornissaannullu inuppassuarnik sulisoqartariaqassaaq, Agathe Fontain oqarpoq.

Taassuma ilanngullugu oqaatigaa, iviangikkut kræfteqalersinnaanermik misissuisarneq tutsuiginavissuunngimmat. Arnaqarpoq misissortinnerminni kræftiusinnaasumik suussusaali qulakkeerneqarsinnaanngitsumik malussarfiusunik. Arnat taakku soorunami misissorteqqittariaqarput. Amerlasuut qujanartumik kræftimik nappaateqannginnerat paasineqassaaq, ataasiakkaalli iviangimikkut kræfteqartut qinnguartaalluni assiliinikkut paasineqanngitsuussapput.

- Iviangimikkut tinusumik malussartunut, tinuneq peersillugu misissugassanngortitsineq ullumikkut arnanut tamanut neqeroorutaavoq. Arnat iviangimikkut tinunermik malussartut neqeroorummut tamatumunnga innersuukkusuppakka, Agathe Fontain naggasiivoq.

Tassuma kræfti pillugu pilersaarusiaq 2013-imi upernaakkut saqqummiunneqartussaq utaqqimaaqqaarusuppaa.