Ittoqqortoormiini piniarnikkut ajornartorsiorneq: Naalakkersuisut immikkut ittumik iliuuseqartut

Ukiuni kingullerni Ittoqqortoormiini pisassiissutit upernaakkulli nungunneqartarput. Pisassiissutit sukannerpallaartut piniartut peqatigiiffiisa ilaat oqarput, tamannalu naggataagut piniarnermut inuussutissarsiummut piniartullu ilaqutaannut eqquisarpoq. 

- Qilalugarniarneq inuussutissarsiutit pingaarnersaraat, qilalugartassiissutilli ima ikitsigilernikuupput allaat piniartut namminneq neqissaqarlutillu mattassaqartariaqaramik pisaqaraangamik tuniniaasinnaaneq ajorlutik, Ittoqqortoormiini piniartut peqatigiiffianni siulittaasoq Åge Hammeken Danielsen Sermitsiamut juunip 20-ani taama oqarpoq. 

- Piniartullu tunisassaqanngikkunik aningaasanik isertitassaqanngillat, taanna oqarpoq. 

Pissutsit aaqqinniarlugit naalakkersuisut immikkut ittumik iliuuseqarput. 

Ittoqqortoormiini inuussutissarsiutigalugu piniartut nutaanik neqitugaqarnissaat eqqanaarniarlugu qilalukkanik qernertanik tallimanik pisassiisoqassasoq, Aalisarnermut, Piniarnermut, Nunalerinermut Imminut Pilersornermullu Naalakkersuisoq Peter Borg (D) tusagassiuutinut nalunaarummi ilisimatitsivoq. Siorna Kangerlussuup eqqaani qilalukkat qernertat pisarineqanngitsoortut nuunneqartut, taakku allapput. 

Tamatuma saniatigut umimmanniarneq, aggustip aallaqqaataanit oktobarip 15-iata tungaanut ingerlanneqartartoq, sivitsorneqarpoq. Maanna Ittoqqortoormiini inuussutissarsiutigalugu piniarnermut allagartallit piffissami juulip 15-ianit juulip 31-ata tungaanut ukiumoortumik tamakkerlugu pisassiissutissanit inummut ataatsimut amerlanerpaamik umimmannik marloraarsinnaatitaalerput. 

Aalisarnermut, Piniarnermut, Nunalerinermut Imminullu Pilersornermut Naalakkersuisoqarfik naapertorlugu inuussutissarsiutigalugu piniartut tamarmik umimmanniarunik katillugit 20-t missaanni pisarineqassapput. 

- Taassuma saniatigut pilersaarutit allat suliallu ingerlasut ataavartumik aaqqiissutaasinnaasut periarfissat pillugit Naalakkersuisunut ilaasortap Kommuneqarfik Sermersuumi borgmesteri allakkatigut attaveqaqatigaa, tusagassiuutinut nalunaarummi Peter Borg allappoq. 

Ittoqqortoormiini nannuttassat ukioq manna 35-usut apriilimi nungupput. Qilalukkanik qernertanik pisassiissutit ukioq manna 17-iupput, maajimilu ullormi ataatsimi tamakkerneqartut, Sermitsiaq allappoq.