Assi: Larsen Jens Kragh

Naalakkersuisut ataasinngornermi ikinnerussuteqaleratarsinnaasut

Naalakkersuisut avaqqullugit amerlanerussuteqartut Inatsisartuni aalajangiiffigisassatut siunnersuutaat ataasinngornermi siullermeerneqassaaq. Naalakkersuisut taamaalillutik ikinnerussuteqaratarsinnaapput.

Siunnersuut immikkut ittoq Inatsisartuni aalajangiiffigisassatut ataasinngornermi eqqartorneqartussanngorpoq.

Partiit amerlanerussuteqartut isumaginninnermut naalakkersuisup isumaa allanngoqqullugu Inatsisartut ataatsimiittarfissuanni ataasinngornermi erngertumik iliuuseqarnissamik piumasaqassapput.

Tasiilami nunattalu sinnerani meeqqat kinguaassiutitigut kannguttaatsuliorfigineqarsimasut qanoq qaqugulu ikiorneqassanersut suli isummerfigineqanngilaq.

AAMMA ATUARUK Illuatungiliuttut Demokraatillu tusaaneqarnissartik naatsorsuutigaat

Taamaammat Partii Naleqqap, Suleqatigiissitsisut, Atassutip, Inuit Ataqatigiit partiilu naalakkersuisunut ikorfartortaasoq Demokraatit atsioqatigiinnikkut Inatsisartuni aalajangiiffigisassatut piumasaraat danskit naalagaaffiannit erngertumik ikiorneqarumassasugut.

Tasiilami isumaginninnermut pissutsit ajorluinnartutut DR-ip piviusulersaarutaani maajimi saqqummiunneqarmata suliaq inuiaqatigiini politikkikkullu oqallisigineqalerpoq.

Suliarlu qaqinneqaqattaarpoq kimigiisissutigineqaqattaarlunilu.

AAMMA ATUARUK Abelsen aalajangiussisimavoq: Misissuereertinnata qaavatigut ikiorneqassanngilagut

Danskit naalagaaffiata isumaginninnermut pissutsinik aaqqeeqataajumalluni nunarput ikiorumavaa, naalakkersuisulli ajornartorsiutaasut nammineq qanimut misissoqqaarusukkamigit danskit naalagaaffiat qujaannarfigaa.

Naallu partiit amerlanerussuteqartut isumaginninnermut naalakkersuisoq (S) kimigiiserfigigaluaraat, naalakkesuisup Tasiilami isumaginninnikkut ajornartorsiutit pillugit paasiniaqqaarnissaminik isummani suli aalajangiusimavaa.

AAMMA ATUARUK Ajornartorsiutaasut qulaajarneqarluaqqaartariaqartut

Taamaammat Naalakkersuisut ataasinngornermi ikinnerussuteqalernissaat ilimanaateqarpoq. Imaanngilarli naalakkersuisuujunnaarsitsisoqassasoq, aatsaammi tatiginnikkunnaarnikkut tunuartitaasinnaavoq.

Naalakkersuisup isummaminik allannguiniannginnera pillugu partiit piumasaqartut naalakkersuisunut ikorfartortaasunit Demokraatinit aggersarneqassasut, Demokraatineersup Nivi Olsenip KNR-imut ualeq manna oqaatigaa. 

Aamma naalakkersuisuujunnaartitsinissamik siunertaqaratik, Nivi Olsenip ilanngullugu erseqqissaatigereerpaa.

Isummersuutit



Nutaarsiassaateqarpit?

Nutaarsiassaateqarpit?

1717-imut SMS-erit, UNNIA allariarlugu kingornalu oqaluttuat allallugu.

Immersuivik atorlugu allaffigitigut knr.gl/1717

Emailikkulluunniit 1717@knr.gl

KNR TV: TekstTV-mi paasissutissat

TTV q 110 Ullut tamaasa nutaarsiassat

TTV q 400 Timmisartuutinissat
aallartussat tikitussallu

TTV q 300 Tv-kkut aallakaatitassat
tulleriiarnerat

TTV q 300 radiukkut allakaatitassat
tulleriiarnerat