Illuatungiliuttut Demokraatillu tusaaneqarnissartik naatsorsuutigaat
Partiit amerlanerussuteqartut Naalakkersuisunut noqqaassutigaat nunarput isumaginninnikkut pissutsinut Danmarkimit ikioqqussasoq.
Partiit amerlanerussuteqarlutik noqqaammata nukittuutut inissisimapput, Nivi Olsenillu naatsorsuutigaa isumaginninnermut naalakkersuisoq kissaataannik piviusunngortitsissasoq.
- Qularutiginngilara oqariartuuterput qisuariarfigissagaa, qisuariarnissaa utaqqimaalaartigu, tassungalu killikkutta, qisuariaataa aallaavigalugu, qanoq qisuariaqqissanersugut paasinarsissaaq, Demokraatineersoq Nivi Olsen oqarpoq.
Tasiilami kannguttaatsuliornerit
Tasiilami pigisaanilu kinguaassiutitigut pinerluttuliornerit ukiuni kingullerni pingasuni nalunaarutigineqartut 193-iupput.
Meeqqanut kannguttaatsuliornerit pillugit nalunaarutiginninnerit siorna 20-upput.
Tasiilami pigisaanilu meeqqanut kinguaassiutitigut pinerluttuliornerit pillugit suliat 15-it maannakkorpiaq suliarineqarput.
Meeqqat illersuisuata aamma erseqqissaatigaa suliaqarfimmi kisitsisit amigartupilussuusut.
Agguaqatigiissillugu meeqqat pingasuugaangata ataaseq kinguaassiutitigut kannguttaatsuliorfigineqarsimasarpoq, meeqqallu marluugaangata ataaseq kommunip isumaginnittoqarfianut suliassanngortinneqarsimasarluni.
Partii Naleraq, Demokraatit, Inuit Ataqatigiit, Atassut Suleqatigiissitsisullu atsioqatigiinnikkut Naalakkersuisut avaqqullugit Inatsisartuni aalajangiiffigisassatut siunnersuuteqarput.
Meeqqanik kinguaassiutitigut atornerluinerit pillugit isumaginnittoqarfimmilu suliassanngortinneqartut naammassineqarneq ajortut aaqqiiviginiarlugit danskit naalagaaffiannit maanna ikioqqussasugut.
AAMMA ATUARUK Naalakkersuisut isumaginninnermut tunngatillugu amerlanerussuteqartunit tamakkiisumik kimigiiserfigineqartut
Partiit amerlanerussuteqartut Naalakkersuisunut inassutigaat danskit Naalakkersuisui peqatigalugit aningaasaleeqatigiissinnaaneq periarfissarsiuunneqassasoq.
Nunattami suliaq kisimiilluni kivissinnaanngikkaa, Inuit Ataqatigiinneersoq Muté Bourup Egede oqarpoq:
- Takusinnaavarput pinasuartumik namminneerluta suna tamaat aningaasalersorsinnaaneranut iliuuseqarnissamillu nukissat piginngikkigut, Muté Bourup Egede oqarpoq.
Inulerisut pisariaqartinneqartut
Isumaginninnermut naalakkersuisoq, ajornartorsiutaasut qulaajarneqaqqaartariaqarnerat tunngavilersuutigalugu avataanit ikiorneqarnissamik noqqaassuteqarnissamut itigartitsimmat, partiit atsioqatigiinnikkut qisuariarput.
AAMMA ATUARUK Nunatsinni tamani ajornartorsiortoqarmat suliassaqaqaagut
DR-ip piviusulersaarutaa "Byen hvor børn forsvinder" Tasiilamut tunngassuteqarpoq.
Tasiilami meeqqat pingasuugaangata ataatsip kinguaassiutitigut atornerlugaasimasarnera meeqqallu marluugaangata ataatsip kommunip isumaginnittoqarfianut suliassanngortinneqarsimanera piviusulersaarummi saqqummiunneqarpoq.
Piviusulersaarutip kingunerisaanik Tasiilami nunattalu sinnerani isumaginninnikkut ajornartorsiutit kingumut oqallissaaqqilerput.
Sorpiaammi ajornartorsiutaanerat ersarereertoq, Demokraatineersoq Nivi Olsen erseqqissaavoq:
- Kinguaassiutitigut atornerluineq, imigassamik ajornartorsiuteqarneq, aningaasanoorajunneq ikiaroornartorlu. Taakkuupput ersarittorujussuarmik ajornartorsiutaasut, taamaammat oqartoqarsinnaanngilaq 'Tasiilamukarlunga takoqqaalaariarlara susoqarnersoq'.
Danskit Naalakkersuisui ilaqutariinnut aqqutissiuisunik, tarnip pissusaanik ilisimasalinnik isumaginninnermillu tunngasunik suliaqartunik allanik sulianik uninngaannalersimasunik suliaqariartortitsissasut, partiit kissaatigaat.
- Inulerisut tassa taakkuupput atorfissaqarteqqinnaakkagut, taamaammat taakkupput kissaatigut. Kisianni soorunami tusarusupparput danskit sumiguna ikiorsinnaaniarluta qanorlu ikiuisinnaallutik takorluugaqarnerat, Nivi Olsen oqarpoq.
