Tarnip pissusaanik ilisimasalik: Nunatsinni tamani ajornartorsiortoqarmat suliassaqaqaagut
Kinguaassiutitigut atornerluisarnerit imminullu toquttarnerit ajornartorsiutaatillugit inuiaqatigiit inooqataanikkut kalluarneqartarnerat qanoq sunniuteqartarnera pillugu tarnip pissusaanik immikkut ilisimasalik paasiniaaffigaarput, nunatsinnilu annertuumik suliassaqartoqartoq, Naja Lyberth isumaqarpoq.
- Pinartumik nunatsinni Tasiilamilu suliassaqarpugut, katsorsarneqarnissaminnillu pisariaqartitsut ilisimasaqarluartunik pikkorissunillu katsorsaasoqarnissaat pisariaqarluinnarpoq, taakkualu kulturikkut ilisimasaqartariaqarlutik, tarnip pissusaanik immikkut ilisimasalik, kingunerluutillu pillugit immikkut ilinniarsimasoq, Naja Lyberth oqarpoq.
Ajornartorsiutillu nalaanneqartartut qiviassagaanni qangatut nalitsinnilu persorsagaaneq qiviartariaqartoq, Naja Lyberth isumaqarpoq:
- Qanga ilaqutariittut ataatsimoortussiatut naalattussiatullu perorsagaavugut immitsinnullu akissaaffilersorlutalu pituttoqqissaarlutalu napaqatigiittussatut persorsagaalluta, ullutsinnilu ilaqutariittut inuuneq imaalersimavoq, inuusuttuaqqat 18-inik ukioqaleraangamik akisussaaffimmik tigusillutik inuunitik namminneq aqulissagaat naatsorsuutigineqarpoq, Naja Lyrberth oqarpoq.
Timmisartoq assersuutigalugu
Naja Lyberthip ullutsinni qangalu inooriaaserput ima assersuusiorfigaa: Timmisartoq marlunnik aquttoqartarpoq aamma saqisoqartarpoq ilaasunik kiffartuussisartumik, qangalu persorsaariaaseq naapertorlugu imaappoq:
- Timmisartumi aataakkut aanaakkullu "aquttuusarput" - tassa ilaqutariinni siuttuusarput - timmisartumilu saqisut tassaasarput angajoqqaat, taakkua angajoqqaatik naalagaralugit saqisuusarput timmisartumilu ilaasut tassaasarput meeqqat, taakkua tunuaniittussatut inissisimasarput, Naja Lyberth oqarpoq nangillunilu:
Ullutsinnilu persorsagaanerput malillugu 18-inik ukioqalersimasut inuunitik namminneerlutik akisussaaffigileraangamikkik "aquttarfimmi" aquut tigusussanngortarpaat naak ilaat ilitsersorneqarsimanngikkaluarlutik.
- Ataatsimoortussatut suli perorsagaasarujussuusarpugut 18-ileereersimasut ilaat ingerlalluartarput aammali ilaqarput sumiginnagaasimanertik qangatullu persorsagaasimanertik pissutigalugit nammineq timmisartumi namminneerlutik aqunniaraluarlutik nakkarujussuartoortartut - ullutsinnimi piumasaqaatinut naleqqutinngitsunik perorsagaagamik, Naja Lyberth taama assersuusiorpoq.
Timmisartumilu aquttuuniaraluartut ajornartorsiulersartut Naja Lyberth oqarpoq. Soorlu timmisartumi saqisut, tassa angajoqqaat, saqisuusinnarlutik timmisartumi aquttussanngortinneqaraangamik - timmisartup iluani ajornartorsiortoqalertarpoq allaallu timmisartoq nakkarsinnaalluni.
- Ilaat imigassamut ikiaroornartumullu atornerluisunngortarput, ilaqutariinni ilaatigut nakuusertoqarneratigut ajornartorsiutoqalertarpoq puullaaqisoqalertarpoq, soorlu suliffeqarfinni arnarpassuit puullaaqinermik napparsimalersoortarput, allat kiffartuuppallaarlugit imminnut naalaarpiarsinnaajunnaartarput tassa inuunerminni aquut tiguneq ajulertarpaat - taakkuuppullu pissusilersuutigisartakkat avataanit isiginiarneqartartut, Naja Lyberth oqarpoq.
Akisussaaffeqalerneq
Aquummik tigusisoqaraangat inuit ilaat puullaaqinermik ajornartorsiuteqalertarput. Nakkaattoornerit pinngitsoortinniarlugit ullutsinni perorsaariaaseq eqqarsaatigalugu inuttut akisussaaffeqalissagutta "aquut" tigusariaqaripput, Naja Lyberth oqarpoq nangillunilu:
- Aquuteqarfipput qaratsatta qulaaniittoq, tassa timmisartup aquttarfiatut assersuunneqartoq tikittariaqarparput, tassunga pisariaqarluinnarpugut ullumikkut inuussagutta saniatigullu ataatsimoorsinnaasaqariaqarpugut tamannalu ilinniaatigalugulu nammineersinnaassuserput aamma ilinniartariaqarlutigu, Naja Lyberth oqarpoq.
Killiffimmi tassani nunatsinni annertuumik suliassaqartugut tarnip pissusaanik immikkut ilisimasalik isumaqarpoq.
- Qujanartumik inoqarpoq iluatsilluartumik ingerlasunik, kisianni aamma katataasorpassuaqarpoq, tassa timmisartoq assersuutigigaanni nakkartorpassuit amerlaqaat, taakkuupput nunatsinni massakkorpiaq ikiorneqarnissaminnut pisariaqartitsinerpaasut, tarnip pissusaanik immikkut ilisimasalik kingunerluutillu pillugit immikkut ilinniarsimasoq, Naja Lyberth oqarpoq.
