Naalakkersuisut isumaginninnermut tunngatillugu amerlanerussuteqartunit tamakkiisumik kimigiiserfigineqartut
Amerlanerussuteqartut immikkut illuinnartumik iliuuseqarlutik Naalakkersuisut avaqqullugit Inatsisartuni aalajangiiffigisassatut siunnersuuteqarput.
Nunatsinni meeqqanik inuusuttunillu isumaginninnikkut sullissinermut tunngatillugu Danmarkimit ikioqquneqarnissamik Naalakkersuisut saaffiginnissuteqarnissaat sakkortuumik kaammattuutigineqarpoq.
Tasiilami kannguttaatsuliornerit
Tasiilami pigisaanilu kinguaassiutitigut pinerluttuliornerit ukiuni kingullerni pingasuni nalunaarutigineqartut 193-iupput.
Meeqqanut kannguttaatsuliornerit pillugit nalunaarutiginninnerit siorna 20-upput.
Tasiilami pigisaanilu meeqqanut kinguaassiutitigut pinerluttuliornerit pillugit suliat 15-it maannakkorpiaq suliarineqarput.
Meeqqat illersuisuata aamma erseqqissaatigaa suliaqarfimmi kisitsisit amigartupilussuusut.
Agguaqatigiissillugu meeqqat pingasuugaangata ataaseq kinguaassiutitigut kannguttaatsuliorfigineqarsimasarpoq, meeqqallu marluugaangata ataaseq kommunip isumaginnittoqarfianut suliassanngortinneqarsimasarluni.
Meeqqat inooqataanikkut ajornartorsiortut sullinneqarnerat sapaatit akunnerini kingullerni oqallisaasupilussuuvoq.
Oqalligisineqarneranullu Danmarkip Radioata piviusulersaarutaa "Byen hvor børn forsvinder" (Illoqarfik meeqqat qimagussorfiat, aaqq.) pissutaalluinnarpoq, Tasiilamimi meeqqat inuusuttullu isumaginninnikkut sullinneqarnerat aallakaatitami annertuumik sammineqarmat.
"Naalakkersuinikkut akisussaassuseqanngitsumik ingerlatsineq"
Partii Naleqqap, Atassutip, Suleqatigiissitsisut, Demokraatit Inuit Ataqatigiillu siulittaasui aalajangiiffigisassatut siunnersuummi ilaatigut ima allapput:
- Partiit atsioqatigiittut pisariaqarsoraat immikkut ilassutinik aningaasaliisoqassasoq. Meeqqat atugarliortut ikiorasuarneqarnissaat aamma danskit naalakkersuisui peqatigalugit aningaasaleeqatigiissinnaaneq periarfissarsiuunneqassasoq inassutigaarput, aalajangiiffigisassatut siunnersuummi sisamanik qupperneqartumi taama allapput.
AAMMA ATUARUK Tarnip pissusaanik ilisimasallit Tasiilamukartarnerat ingerlaannassaaq
Isumaginninnermut naalakkersuisup Martha Abelsenip (S) Danmarkimit maannakkorpiaq ikiorneqarnissaq arlaleriarlugu itigartitsissutigereerpaa. Ajornartorsiutaasut sukumiinerusumik paasisaqarfigeqqaarusuppai, taamaattumillu maajip naanerani Tasiilamut tikeraarnissani pilersaarutigalugu.
Taamatulli nalunaaruteqarnera siunnersuuteqartut naammaginartinngilaat.
DR-ip piviusulersaarutaa "Byen hvor børnene forsvinder" Tasiilamut tunnassuteqarpoq.
Tasiilami meeqqat pingasuugaangata ataatsip kinguaassiutitigut atornerlugaasimasarnera meeqqallu marluugaangata ataatsip kommunip isumaginnittoqarfianut suliassanngortinneqarsimanera piviusulersaarummi saqqummiunneqarpoq.
Piviusulersaarutip kingunerisaanik Tasiilami nunattalu sinnerani isumaginninnikkut ajornartorsiutit kingumut oqallissaaqqilerput.
- Isumaginninnermi aqutsisoqarfimmi Namminersorlutik Oqartussat ataanni pissutsit naluneqanngillat, ilisimaneqarluarput. Taamaattumik oqartoqarsinnaanngilaq paasinaguluunniit sukkununa pisariaqartitsisoqartoq, ikioqqusinnaanngilagumik oqaannartoqarsinnaanngilaq, partiit siulittaasui taama allapput.
Tamatumunngalu peqatigitillugu Naalakkersuisut isummernerat akuerineqarsinnaanngitsut aalajangiiffigisassatut siunnersuummi oqaatigaat.
AAMMA ATUARUK Nunatsinni tamani ajornartorsiortoqarmat suliassaqaqaagut
- Akuersaarneqarsinnaanngilaq nunatta naalakkersuisuisa ikiorsiinissaq pisariaqanngitsutut nalilersorlugu itigartitsisaqattaarnerat, tamanna akisussaassuseqanngitsuliornerusoq isumaqarpugut, partiit siulittaasui taama allapput.
Aalajangiiffigisassatut siunnersuut Inatsisartut suleriaasianni § 33 naapertorlugu saqqummiunneqarpoq, atsiortullu tassaapput Hans Enoksen, Randi V. Evaldsen, Muté B. Egede, Sivert K. Heilmann aamma Tillie Martinussen.
Naalakkersuisoq Martha Abelsen (S) ullaap tungaani oqaaseqartissinnaasimanngilarput.
