Partii Naleraq, Demokraatit, Inuit Ataqatigiit, Atassut aamma Suleqatigiissitsisut Danmarkimiit ikiorneqarnerunissamik kissaateqartuupput. Asseq toqqorsivimmitAssi: Kommuneqarfik Sermersooq

Abelsen aalajangiussisimavoq: Misissuereertinnata qaavatigut ikiorneqassanngilagut

Naalakkersuisup, Martha Abelsenip, kimigiiserfigineqaraluaqaluni, suna pisariaqarnersut aalajangertigani, Tasiilami qanoq ikorneqarnissaq pisariaqarnersoq misissoqqarniarlugu aalajangiusimavaa.

Tasiilami nunattalu sinnerani isumaginninnikkut ajornartorsiutit pillugit ikioqqulluni qallunaat naalagaaffiannut Naalakkersuisut saaffiginneqqullugit piumaffigeqassasut, partiit tallimat Inatsisartuni ippassaq piumasaqarput.

Martha Abelsenilli Tasiilami qanoq ikiuisoqassanersoq misissueqqaarnissaq aalajangiusimavaa.

Tasiilami kannguttaatsuliornerit
Tasiilami pigisaanilu kinguaassiutitigut pinerluttuliornerit ukiuni kingullerni pingasuni nalunaarutigineqartut 193-iupput.

Meeqqanut kannguttaatsuliornerit pillugit nalunaarutiginninnerit siorna 20-upput.

 

Tasiilami pigisaanilu meeqqanut kinguaassiutitigut pinerluttuliornerit pillugit suliat 15-it maannakkorpiaq suliarineqarput.

Meeqqat illersuisuata aamma erseqqissaatigaa suliaqarfimmi kisitsisit amigartupilussuusut.


Agguaqatigiissillugu meeqqat pingasuugaangata ataaseq kinguaassiutitigut kannguttaatsuliorfigineqarsimasarpoq, meeqqallu marluugaangata ataaseq kommunip isumaginnittoqarfianut suliassanngortinneqarsimasarluni.

Kimigiiserfigineqaleraluttuinnartorli, peqqissutsimut, isumaginninnermut inatsisinillu atuutsitsinermut naalakkersuisoq, Martha Abelsen, eqqissisimavoq isummiussanilu aalajangiusimaannarlugit.

AAMMA ATUARUK Naalakkersuisut isumaginninnermut tunngatillugu amerlanerussuteqartunit tamakkiisumik kimigiiserfigineqartut

- Taamaaliortut ilisimavara, allamilli oqarsinaanngilanga, inersuarmi suliarineqarnissaa utaqqissavara, taava tassannganniit iliuuseqarumaarpunga, Martha Abelsen oqarpoq.

Naalakkersuisoq aamma isumaqarpoq, erseqqissartariaqartoq, Danmarkimik isumaqatiginninnikkut maannakkut suleqatiginnikkamik. Amerlanerussuteqartulli Martha Abelsenimut illua tungilersuisut qaavatigut ikorneqarnissamik suli kissaateqarput.

AAMMA ATUARUK Illuatungiliuttut Demokraatillu tusaaneqarnissartik naatsorsuutigaat

Pineqartoq naatsumik
- DR-ip piviusulersaarutaa "Byen hvor børn forsvinder" Tasiilamut tunngassuteqarpoq.
- Tasiilami meeqqat pingasuugaangata ataatsip kinguaassiutitigut atornerlugaasimasarnera meeqqallu marluugaangata ataatsip kommunip isumaginnittoqarfianut suliassanngortinneqarsimanera piviusulersaarummi saqqummiunneqarpoq.
- Piviusulersaarutip kingunerisaanik Tasiilami nunattalu sinnerani isumaginninnikkut ajornartorsiutit kingumut oqallissaaqqilerput.
- Illuatungiliuttut partiillu tapertaasut Demokraatit aalajangiiffigisassatut siunnersuummik pingasunngormat saqqummiussipput: Naalakkersuisut isumaginninnikkut ikiorneqarnerunissamik Danmarkimut noqqaassuteqarnissaart piumasaqaatigaat.

Ikiorneqarnerunissamik kissaateqartut

Martha Abelsenili oqaqqippoq, isummertigani misissueqqaaarumalluni Tasiilamilu innuttaasut oqaloqatigeqqaarumallugit.

- Danmarkimut saaffiginnissinnaavunga, qanorli ikiorneqassanersugut erseqqissisissalugu pingaarpoq, taamaammat qanoq pisoqarnissaanik isummertinnanga, Tasiilami innuttaasut sumik kissaateqarnerannik apereqqaarnissaat aalajangiusimavara, Martha Abelsen oqarpoq.

Partii Naleraq, Demokraatit, Inuit Ataqatigiit, Atassut aamma Suleqatigiissitsisut Danmarkimiit ikiorneqarnerunissamik kissaateqartuupput.

 

Isummersuutit



Nutaarsiassaateqarpit?

Nutaarsiassaateqarpit?

1717-imut SMS-erit, UNNIA allariarlugu kingornalu oqaluttuat allallugu.

Immersuivik atorlugu allaffigitigut knr.gl/1717

Emailikkulluunniit 1717@knr.gl

KNR TV: TekstTV-mi paasissutissat

TTV q 110 Ullut tamaasa nutaarsiassat

TTV q 400 Timmisartuutinissat
aallartussat tikitussallu

TTV q 300 Tv-kkut aallakaatitassat
tulleriiarnerat

TTV q 300 radiukkut allakaatitassat
tulleriiarnerat