Naalakkersuisut arlaleriarlutik inatsimmik unioqqutitsipput
![](/sites/default/files/styles/image_934x467/public/article_images/hans_enoksen_bagfra630_0.jpg?itok=1vyCWzUI)
Inatsisartut kukkunersiuinermut ataatsimiititaliaata isumaliutissiissut saqqummiutereeraa ippassaq Naalakkersuisunut tatiginnikkunnaarnermik siunnersuuteqartoqaraluarpoq. Taamaattoq partiit naalakkersuisuutitallit kukkunerit isornartorsiorneqartut nassuerutigaat.
Naalakkersuisut aningaasaliisinnaatitaanngillat aningaasaliissutissat Inatsisartunit akuerineqarsimatinnagit. Taamaattoq arlaleriarluni taama pisoqarpoq 2010-p naalernerani Palle Christiansen Demokraatineersut Aningaasaqarnermut naalakkersuisuutillugu.
Unioqqutitsoqarpoq naatsorsueqqisaartarfimmut aningaasaliisoqarmat taakku 2010 naalersoq paasimmassuk aningaasaliissutigineqartut iluanni aningaasartuutit matussusersinnaajunnaarlugit. Aningaasaliiffigineqaqqinnissamik pisariaqartitsineq pivoq naatsorsueqqissaartarfiup pisortarisimasaata soraarnerani ajunngitsorsiassaliisoqarsimammat, erninermut atatillugu sulinngiffeqarnermut, sulinngiffeqarnermut ajunngitsorsiassanut kiisalu siunnersortinik atuinermut. Taakku katillugit 740.000 koruuninik immikkut pisariaqartitsilernermut tunngaviupput.
Naatsorsueqqissaartarfiup aningaasat taakku pisarsiarai kisianni akuersissutigineqarsimanngilat. Kukkunersiuinermut ataatsimiititaliaq isumaliutissiissummini allappoq tamanna missigersuusiornermut inatsimmik unioqqutitsinerusoq kanngunaannartumik taasariaqartoq.
Missigersuusiornermut inatsit aamma unioqqutinneqarpoq ilinniartut ineqarfiinut aqutsisoqarfik KAF atuivallaarsimaneq pillugu 2010 naalersoq aningaasaliiffigineqarmat. Aningaasalli taakku aamma inatsisartunit akuersissutigineqarsimanngillat. Aamma taama pisoqaqqippoq Ilimmarfik immikkut aningaasaliiffigineqarnissamik pisariaqartitsilermat. Aningaasaliissutigineqartut akuerineqarsimanngikkaluartut aamma tunniunneqarsimapput.
KAF-imut aamma Ilimmarfimmut aningaasaleeqqinnerit missigersuusiornermut inatsimmik unioqqutitsinerusut kukkunersiuinermut ataatsimiititaliaq allappoq.
- Ataatsimiititaliap isornartorsiuinera politikkikkut sulinermut tunngatinneqarneruvoq Namminersornerusuni allaffissornikkut aaqqissuussinermi allannguutit atuutsinneqarnissaannut nakkutilliinissallu pilersaarusiornissaannut sulinermi aqutsisoqarfiup tungaatigut piginnaasalinnik pisariaqartinneqartunik aqutsisoqarnissamut oqartussaasunut akisussaammata, kukkunersiuinermut ataatsimiititaliaq allappoq.
Tassalu taamatut isornartorsiuisoqarnera tunngavigalugu illuatungiliuttut siunnersuutigigaluarpaat Naalakkersuisunik tatiginnikkunnaarluni taasisoqassasoq. Siunnersuulli Inuit Ataqatigiit, Demokraatit aamma Kattusseqatigiit Partiiata itigartippaat. Partiilli taakku pingasut ilanngullugu oqaatigaat isornartorsiutigineqartut tusaatissatut tiguneqartut.
- Una politikkimut attuumassuteqanngilaq. Una nunap ingerlanneqarneranut aammalu nunap demokratiskiusup nunamik aqutsinermi inatsisaanik tunngavigineqartunik unioqqutitsineruvoq, Siumut aamma Atassut tusagassiutinut nalunaarumminni allapput, erseqqissarlugulu unioqqutitsineq akuersaarsinnaanngilluinnaritsik
- Amerlanerussuteqartut inatsisit malinneqartussat unioqqutippai demokratiimillu ingerlatsinermi malitassat pingaartinneqaratik amerlanerussuteqarneq naalagarilerlugu ingerlatsisoqalernera nunatta aqunneqarneranut isigineqarneranullu kanngunartuliaavoq angisooq, Siumukkormiut Atassutikkormiullu oqarput.