Qaleralittassatut inassutit: Naalakkersuisut akunnattooqqasut

Ukiunut tulliuttunut marlunnut qaleralittassatut siunnersuutit Naalakkersuisut qanillattorpaat, aalisartulli oqariartuutaat sanillersuunneqartariaqartut, aalisarnermut naalakkersuisoq oqarpoq.
- Aalisakkanik siunnersuisartut siunnersuinerannut qanillattornissaq Naalakkersuisunit allannguuteqartinneqarnikuunngilaq, Jens Immanuelsen taama oqarpoq.
Allattoq Andreas Wille
juunip 25-at 2020 11:21

Pinngortitaleriffiup NAFO peqatigalugu sinerissap qanittuani ukiunut tulliuttunut marlunnut qaleralittassanik siunnersuuteqarnerat naalakkersuisunit tusarluarneqartoq, aalisarnermut naalakkersuisup Jens Immanuelsenip KNR-imut oqaatigaa. Naak siunnersuineq tigulluaraluarlugu malinneqassanersoq neriorsuutiginngilaa, aalisartummi isumaat aamma pingaartippaa.

- Najukkami aalisartut maluginiagaat pingaartorujussuupput, illuatugaani aalisakkanut ilisimatuut oqariartuutaannut sanillersuutissallugit, Jens Immanuelsen oqarpoq. 

Taassuma sumiiffiit ilaanni qalerallit angissussaat suli navianartorsiortut, pisassiissutitullu inassutinik malinninnerusalernissaq Naalakkersuisuni anguniaritsik ilanngullugu oqaatigaa.

- Tusaanngitsuusaarsinnaanngilarput aamma soorunami uumassusilerituut taamatut oqariartornerat piffiit ilaanni mianersornerusoqartariaqartoq, Jens Immanuelsen oqarpoq.

Pisassat ikinnerit

NAFO-p oqarnera naapertorlugu Qeqertarsuup Tunuani Uummannamilu kisitsisit takutippaat qalerallit ilungersunartumi suli inissisimasut.

Nuummi qaleralittassat 2021-imi 647 tonsiunissaat inassutaavoq. Ukiunilu tulliuttuni pingasuni affaannanngortikkiartorneqassasut siunnersuutigineqarpoq.

AAMMA ATUARUK Qaleralinniarneq: Sisimiunit Qaqortumut innersuussutit nutaat

Naalakkersuisulli ukiuni tulliuni sisamani biologit inassutaannik malinninnerusalernissartik suli tunaartarigaat, Jens Immanuelsennip oqaatigaa.

- Aalisakkanik siunnersuisartut siunnersuinerannut qanillattornissaq Naalakkersuisunit allannguuteqartinneqarnikuunngilaq, Jens Immanuelsen taama oqarpoq. Taassuma siunnersuutit Naalakkersuisunut ingerlateqqissimallugit uppernarsarpaa, ukiallu ingerlanerani aalajangersaajumaarlutik oqaatigalugu.