Qaleralinniarneq: Sisimiunit Qaqortumut innersuussutit nutaat
Aalisartunut qaleralinniartartunut nutaarsiassaqarpoq. Qalerallimmi Sisimiunit Qaqortumut sinerissap qanittuaniittut avataaniittullu avissaartinneqarput.
Pinngortitaleriffik (NAFO) tusagassiuutinut taama paasissutissiivoq.
Sinerissap qanittuani qaleralinniarfiit nutaat tassaapput Sisimiut-Maniitsoq, Nuuk aamma Paamiut-Qaqortoq sumiiffinnullu taakkununnga pingasunut siunnersuinerit 1960-imit 2018-imut aalisarnermut paasissutissanik tunngaveqarput. NAFO-p qaleralinnik pisaqarneq ima siunnersuutigaa:
- Sisimiut-Maniitsoq, ukiuni 2021 aamma 2022-mi ukiumut pisat 300 tonsinik amerlanerussanngitsut.
- - Nuuk, ukiut pingasut ingerlanerini 398 tonsinngortinneqariartussasut. Taamaattumik 2021-mi pisassarineqartut 647 tonsit qaangissanngilaat, 2022-mi 522-it qaangerneqassanngitsut innersuussutaavoq.
- - Paamiut-Qaqortoq, ukiut pingasut ingerlanerini 222 tonsinut appartikkiartuaarneqassasut.
Sumiiffinni qassiiusuni qaleralikinnerulersoq
NAFO-p oqarnera naapertorlugu Qeqertarsuup Tunuani Uummannamilu kisitsisit takutippaat qalerallit ilungersunartumi suli inissisimarpasittut, avataaniu taleralittassat aalaakkaasumik pitsanngoriartortumillu inissisimallutik.
Qeqertarsuup Tunuani uumassusilerituut misissuinerisa qalerallit 2011-miilli ikiartortut takutippaat, 2016-imiillu 2019-imut oqaluttuarisaanermi aatsaat taama qaleraliisatsigaluni.
AAMMA ATUARUK Ilisimatuut Tunumi qalerallit misissoqqissaarniaraat
Aalisakkat mikinerusut pisarineqartarput, tamanna pissutigalugu aalisakkat ullumikkut pisarineqartartut ukiut qulit matuma siorna pisarineqartartut oqimaaqataat anguniarlugu marloriaataat pisarineqartarput.
Taamaammat pisarineqartunik 4.346 tonit 2021-mi qaangerneqassanngitsoq NAFO-p siunnersuutigaa. Tamanna 2020-mi siunnersuinermut sanilliullugu 800 tonimik appariarneruvoq.
Uummannami qalerallit ikileriarsimasutut oqaatigineqarput. Taamaammat sumiiffimmi tassani qalerallit 5.153 tonit 2021-mi annerpaamik pisarineqarsinnaapput. Taanna 2020-mut siunnersuinermit 650 tonimik annikinneruvoq.
23.530 tonsit nunatsinnut Islandimullu Tunumi 2021-mi qaleralittassiissutigineqassasut, nunat tamat akornanni imartanik ilisimatusarnermi siunnersuisoqatigiit (ICES) innersuussutigaat. Taakku 2.000 tonsinik 2020-mi innersuussutaannit amerlanerupput.
