Naalakkersuisut akuersiinnarput: Tasiilami meeqqat pillugit Danmarkimut ikioqqussaagut
Isumaginninnermut naalakkersuisup Martha Abelsenip (S) isornartorsiorneqarnerminut Inatsisartuni ullumikkut akissuteqassaaq.
Partiit amerlanerussuteqartut, illuatungiliuttut partiilu tapersersortaasoq Demokraatit aalajangiiffigisassatut siunnersuuteqarput. Nunatsinni isumaginninnermut suliassaqarfimmi Danmarkimit ikiorneqarnerunissamik Naalakkersuisut noqqaassuteqarnissaat piumasaraat. Naalakkersuisulli Martha Abelsenip tamanna maannamut akueriumanngilaa.
- DR-ip piviusulersaarutaa "Byen hvor børn forsvinder" Tasiilamut tunngassuteqarpoq.
- Tasiilami meeqqat pingasuugaangata ataatsip kinguaassiutitigut atornerlugaasimasarnera meeqqallu marluugaangata ataatsip kommunip isumaginnittoqarfianut suliassanngortinneqarsimanera piviusulersaarummi saqqummiunneqarpoq.
- Piviusulersaarutip kingunerisaanik Tasiilami nunattalu sinnerani isumaginninnikkut ajornartorsiutit kingumut oqallissaaqqilerput.
- Illuatungiliuttut partiillu tapertaasut Demokraatit aalajangiiffigisassatut siunnersuummik pingasunngormat saqqummiussipput: Naalakkersuisut isumaginninnikkut ikiorneqarnerunissamik Danmarkimut noqqaassuteqarnissaart piumasaqaatigaat.
Maannali akuersiinnarpoq. Akissuteqaammi Inatsisartut nittartagaatigut saqqummersinneqartumi allappoq siunnersuut Naalakkersuisunit isumaqatigineqartoq. Ima paasillugu: Naalakkersuisut Danmarkimit ikiorneqarnerunissamik noqqaassuteqarniarput. Qanorli ikiuisoqassanersoq - imaluunniit aningaasat qanoq amerlatigisut pineqarnersut - eqqaaneqanngilaq.
AAMMA ATUARUK Borgmesteri Tasiilaq pillugu: Naalakkersuisunut ikioqqugatta itigartitaavugut
- Naalakkersuisut siunnersuut pillugu qujassuteqarput. Naalakkersuisut isumaqarput siunnersuummi siunertaq tulluartuusoq tapersersortariaqartorlu, aamma oqaatigineqareersutut qallunaat oqartussaasuinik suleqateqatigiinneq pilersinneqareersimavoq, Martha Abelsen taama allappoq.
- Naalakkersuisut Tasiilami Kalaallillu Nunaata sinnerani meeqqanut ilaqutariinnullu pissutsit pilertornerpaamik pitsanngorsaaviginissaat kissaatigaat, aamma taama allappoq.
Isornartorsiuineq ingatsikkaluttuinnartoq
Danmark Radioata Tasiilami ajornartorsiuterpassuit pillugit piviusulersaarutaata "Byen Hvor børnene forsvinder"-ip (Illoqarfik meeqqat qimagussorfiat, aaqq.) aallakaatinneqarnerata kingorna isumaginninnermut suliassaqarfiup isornartorsiorneqarnera sakkortuseriaannarpoq.
Martha Abelsenip nunatta Danmarkimit maannamut ikiuinerata qaavatigut ikiorseqqinneqarnissamik noqqaassuteqarniarani maannamut aalajangiusimagaluarpaa. Aalajangertinnanimi Tasiilami ajornartorsiutaasut nammineq takujumallugit sapaatit akunneranni uani Tasiilaliaqqaarniarluni oqaatigaa.
AAMMA ATUARUK Naalakkersuisut ataasinngornermi ikinnerussuteqaleratarsinnaasut
Amerlanerussuteqartulli piumasaqaatigisaannut maanna akuersiinnarpoq:
- Naalakkersuisut qallunaat oqartussaasui peqatigalugit Kalaallit Nunaata maanna ikiorneqarnerata saniatigut ikiorneqarnissamik pisariaqartitsinersoq ingerlaavartumik eqqartortarpaat, akissuteqaammi taama allappoq.
- Qallunaat oqartussaasuinit ikiorneqarneq imminut ikiornissamut ikiuutitut isikkoqarpoq. Qallunaat kalaallillu oqartussaasuisa ataatsimoorlutik Kalaallit Nunaata siunissamut isigaluni suliassaqarfimmik maannakkumit pitsaanerusumik isumaginnissinnaanissaata tunngavilernissaa pilersinniarlugu suleqatigiipput. Tamanna pillugu isumaqatigiittoqarpoq, taamaattoqarneralu pitsaasumik suleqatigiinnermut ilapittuutaavoq.