Borgmesteri Tasiilaq pillugu: Naalakkersuisunut ikioqqugatta itigartitaavugut
Nunarput tamakkerlugu meeqqat inuusuttullu kinguaassiuutimikkut atornerlunneqartartut amerlassusaat nuna tamakkerlugu ajutuuinnertut oqaatigisaqariaqartoq, Kommuneqarfik Sermersuumi borgmesteri, Asii Chemnitz Narup (IA), isumaqarpoq.
Taamaammat Naalakkersuisut siulittaasuata Kim Kielsenip (S) siuttuunini takutittariaqaleraa, taanna isumaqarpoq.
- Kinguaassiuutitigut atornerluinerit unitsitsinnagit inuttut, inooqatigiissutsikkut kulturikkullu piuneerussaanertut isumaqarfigaara, borgmesteri tusagassiuutinut allappoq.
- DR-ip piviusulersaarutaa "Byen hvor børn forsvinder" Tasiilamut tunngassuteqarpoq.
- Tasiilami meeqqat pingasuugaangata ataatsip kinguaassiutitigut atornerlugaasimasarnera meeqqallu marluugaangata ataatsip kommunip isumaginnittoqarfianut suliassanngortinneqarsimanera piviusulersaarummi saqqummiunneqarpoq.
- Piviusulersaarutip kingunerisaanik Tasiilami nunattalu sinnerani isumaginninnikkut ajornartorsiutit kingumut oqallissaaqqilerput.
- Illuatungiliuttut partiillu tapertaasut Demokraatit aalajangiiffigisassatut siunnersuummik pingasunngormat saqqummiussipput: Naalakkersuisut isumaginninnikkut ikiorneqarnerunissamik Danmarkimut noqqaassuteqarnissaart piumasaqaatigaat.
- Kim Kielsen siornatigut ”ukiut tamarmik meeqqat ukiorisariaqaraluaraat” annertusiartuinnartumik suliniuteqartoqarnissaanik oqaaseqartuartuuvoq, taamaattumik ataatsimoorluta nutaanik aqqutissarsiornissarput annertuumillu suliniuteqarnissarput piareersimaffigigipput naatsorsuutigilluinnarpara, Asii Chemnitz Narup allappoq.
Eqqunngitsumik oqalunneraasoq
Taanna isumaginninnermut naalakkersuisup Martha Abelsenip (S) ullumi siusinnerusukkut oqaasiinut qisuariarpoq.
Isumaginninnermut suliassaqarfiup aqunneqarnera pisariaqassappat kommuninit tiguneqarluni Namminersorlutik Oqartussanit ingerlanneqartariaqalersinnaasoq, Martha Abelsen sioorasaarivoq. Kommunip suliassaq kivissinnaanngippagu, taava soorunami Naalakkersuisut iliuuseqassasut, Martha Abelsen allappoq.
AAMMA ATUARUK Martha Abelsen: Kommunit isumaginninnikkut ingerlatsinerat tiguneqarsinnaavoq
Taanna naapertorlugu kommunit arlaannaalluunniit Naalakkersuisunut meeqqat aamma inuusuttut pillugit suliat pillugit saniatigut ikiorneqarusullutik tapersersorneqarusullutilluunniit qinnuigalugit saaffigisimanngilaat.
Tamannali ilumuungilluinnartoq, borgmester Asii Chemnitz Narup oqarpoq. Akerlianilli Kommuneqarfik Sermersuup saaffiginnittaraluarneri iluaqutaaneq ajortut oqarpoq:
- Arlaleriarluta Naalakkersuisunut saaffiginnissimavugut, pisariaqartitatsinnilli ikiorneqarnata – naliliinernik nalunaarusianillu tunineqaannartarpugut, Asii Chemnitz Narup oqarpoq.
Naalakkersuisut suniarpat?
Borgmesterip nunatsinni borgmesterit tamaasa, Kim Kielsen aamma Martha Abelsen nunatsinni meeqqanik kinguaassiutitigut atornerluineq pillugu qanoq iliuuseqarnissamik eqqartueqatiserai.
- Ukiut tamarluinnaasa amerligaluttuinnartunik aningaasaliijuarpugut, nassuerutigisariaqarparpulli kommunit kisimik suliassamik taama annertutigisumik kivitsisinnaanngimmata. Pissutsit piviusut taamaanneri aliasuutigeqaakka, taanna oqarpoq.
- Nunatsinni Naalakkersuisut danskinit annertuumik ikiorneqarnissamik itigartitsiniarmata, susassaqartut tamarmik ataatsimoorteriarlugit Naalakkersuisut iliuusissaat tusarniartariaqarpavut, Asii Chemnitz Narup.
Naalakkersuisut nunatsinni isumaginninnikkut ajornartorsiutit pillugit Danmarkimit ikiorneroqqullutik qallunaat naalakkersuisuinut saaffiginninnissaannik aalajangiisoqassasoq, partiit Inatsisartuni amerlanerussuteqartitsisut oqaluuserisassanngortitsipput. Taamaaliornissaq naalakkersuisoq Martha Abelsen itigartereerpaa.
Oqaluuserisassaq ataasinngorpat siullermeerlugu oqaluuserineqassaaq.
