Martha Abelsen: Kommunit isumaginninnikkut ingerlatsinerat tiguneqarsinnaavoq
Isumaginninnermut suliassaqarfiup aqunneqarnera pisariaqassappat kommuninit tiguneqarluni Nuummi qitiusumit ingerlanneqartariaqalersinnaavoq.
Isumaginninnermut naalakkersuisoq Inatsisartuni ataasinngorpat naveersinneqarnissani sioqqullugu taama nalunaaruteqarpoq.
Tasiilami kannguttaatsuliornerit
Tasiilami pigisaanilu kinguaassiutitigut pinerluttuliornerit ukiuni kingullerni pingasuni nalunaarutigineqartut 193-iupput.
Meeqqanut kannguttaatsuliornerit pillugit nalunaarutiginninnerit siorna 20-upput.
Tasiilami pigisaanilu meeqqanut kinguaassiutitigut pinerluttuliornerit pillugit suliat 15-it maannakkorpiaq suliarineqarput.
Meeqqat illersuisuata aamma erseqqissaatigaa suliaqarfimmi kisitsisit amigartupilussuusut.
Agguaqatigiissillugu meeqqat pingasuugaangata ataaseq kinguaassiutitigut kannguttaatsuliorfigineqarsimasarpoq, meeqqallu marluugaangata ataaseq kommunip isumaginnittoqarfianut suliassanngortinneqarsimasarluni
Partiimmi amerlanerussuteqartut isumaginninnikkut Danmarkimit ikiorneqarnerunissamik noqqaassuteqarnissamut Naalakkersuisut saaffiginnissuteqarnissaannik aalajangiiffigisassatut siunnersuuteqarput.
Martha Abelsenilli tamanna maannamut itigartitsissutigisimavaa.
- Naalakkersuisut Danmarkimit ikiorneqarnissamik piviusumik neqeroorummik itigartitsinngisaannarsimapput, Martha Abelsen tusagassiorfinnut nalunaarummi taama oqarpoq.
- Naalakkersuisut isumaginninnermi suliassaqarfimmut Danmarkip ikiuisarnera akuerisuaannartarsimavaat, uku pineqaraangata siunnersuineq, ilitsersuineq imaluunniit piviusumik sulisunit taperserneqarneq. Uanga pingaartippara erseqqissaatigissallugu, piffissami sukkulluunniit qallunaat naalagaaffiannit pisortatigoortumik ikiuinissaq imaluunniit tapersiinissaq pillugu saaffiginnittoqarsimanngitsoq, naalakkersuisoq allappoq.
AAMMA ATUARUK Abelsen aalajangiussisimavoq: Misissuereertinnata qaavatigut ikiorneqassanngilagut
Danmarkimit ikiorneqarnissaq 2015-imi itigartitsissutigineqartoq
Folketingilli Kalaallit Nunaannut tunngasunut ataatsimiititaliaanni 2015-imi ataatsimiinneq KNR-imit siornatigut oqaluttuaraarput. Taamani isumaginninnermut naalakkersuisuusup Martha Lund Olsenip danskit naalagaaffiata nunatsinni isumaginninnikkut ikiuinissamik neqeroorutaanut qujaannarpoq.
Taannalu ullumikkut Kommuneqarfik Sermersuumi, taamatullu aamma Tasiilamut, isumaginninnermut pisortatut atorfeqarpoq.
Qitiusumit aqunneqartariaqalersinnaasoq
Isumaginninnermulli suliassaqarfik kommuninit tiguneqartariaqalersinnaavoq. Martha Abelsenimi naapertorlugu kommunit arlaannaalluunniit ikiorneqarnerorusullutik tapersersorneqarusullutilluunniit saaffiginnissimanngillat, meeqqallu inuusuttullu pillugit suliat tunngaviatigut kommunit suliassaralugit.
- DR-ip piviusulersaarutaa "Byen hvor børn forsvinder" Tasiilamut tunngassuteqarpoq.
- Tasiilami meeqqat pingasuugaangata ataatsip kinguaassiutitigut atornerlugaasimasarnera meeqqallu marluugaangata ataatsip kommunip isumaginnittoqarfianut suliassanngortinneqarsimanera piviusulersaarummi saqqummiunneqarpoq.
- Piviusulersaarutip kingunerisaanik Tasiilami nunattalu sinnerani isumaginninnikkut ajornartorsiutit kingumut oqallissaaqqilerput.
- Illuatungiliuttut partiillu tapertaasut Demokraatit aalajangiiffigisassatut siunnersuummik pingasunngormat saqqummiussipput: Naalakkersuisut isumaginninnikkut ikiorneqarnerunissamik Danmarkimut noqqaassuteqarnissaart piumasaqaatigaat.
Suliassarlu kommuninit kivinneqarsinnaanngippat,suliassaqarfik tamaat pillugu qitiusumit ingerlatsilernissaq isumaliutersuutigineqalersinnaavoq, taamaalilluni suliassaqarfimmik kommunit ingerlatsinerat tiguneqarluni, Martha Abelsen taama oqarpoq.
- Kommunip suliassaq kivissinnaanngippagu, taava soorunami Naalakkersuisut iliuuseqassapput, naalakkersuisoq oqarpoq.
DR-ip piviusulersaarutaata - Byen hvor børn forsvinder - (Illoqarfik meeqqat qimagussorfiat, aaqq.) Tasiilami isumaginninnikkut ajornartorsiutinik annertuunik sammisaqarfiusup aallakaatinneqarnerata kingorna nunatsinni isumaginninnikkut ajornartorsiutit kingumut oqallisaaqqilerput.
Martha Abelsenip Danmarkimit ikiorneqarnerunissamik itigartitsinera partiinit amerlanerussuteqartunit illuatungilerneqaraluartoq Naalakkersuisut tunuartariaqarsinnaanerinik isumaqanngilaq. Tatiginnikkunnaarnermik taasititsisoqarneratigut aatsaat tamanna pisinnaavoq.