Naalakkersuisut akissutaat naammaginngilaa
Immikkut ittumik atuartitsinerit ukiumi atuarfiusumi 2010/2011-mi ukioq 2002-mut naleqqiullugu marloriaammik amerlanerupput, immikkullu ittumik atuartitsinermi pissutsit atuuttut qanoq iliornikkut pitsanngorsaaviginiarneqarnersut, Olga P. Berthelsenip apeqquteqaateqarfigai, akissutillu naammaginngilai:
- Assersuutigiinnarlugu immikkut ittumik ilinniartitsisut immikkut ilinniartinneqartarnerat piginnaasaat qanoq suliniarnissaminnut takorluuinersut, Olga P. Berthelsen oqarpoq.
Immikkut ittumik ilinniartitsisussat ilinniarsimasuussasut aamma pikkorissartinneqarsimasuussasut, nalunaarutikkut tamanna aaqqinneqareersoq, ilinniartitaanermut naalakkersuisup Palle Christiansenip oqaatigaa.
Immikkut ittumik ilinniartitsinissamut ilinniarsimallutillu pikkorissarsimasut ukiumi atuarfiusumi 2009/2010-mi 5,3 procentiinnaasut kisitsisit Inerisaavimmeersut takutippaat.
Meeqqat atuarfianni immikkut ittumik atuartitsisarneq aamma allamik immikkut ittumik perorsaanikkut ikiorsiisarneq pillugu Namminersorlutik Oqartussat nalunaarutaat naapertorlugu immikkut atuartitsinerit ilinniartitsisunit immikkut ittumik ilinniarsimasunit pinngitsooratik ingerlanneqartassapput, Palle Christiansen ilaatigut allappoq, nangillunilu:
- Kissaatigissallugu takorloorneqarsinnaagaluarpoq atuartitsinermik ingerlatsiviusumi taamatut ingerlatsisoqarnissaa, pissutsilli ajoraluartumik allaapput, Palle Christiansen taama akissuteqarpoq.
Olga P. Berthelsen tamanna pillugu ima oqarpoq:
- Tassunga tunngatillugu qanoq iliornissamik Naalakkersuisut oqariartuuteqannginnerat pakatsissutigilaarpara, kisianni eqqarsaatersuutigivara tassunga tunngasumik apeqquteqaateqaqqinniarlunga, isumaqarama pisariaqartoq iliuusissamik eqqarsaatersorsuuteqartoqartariaqarnera, aamma pilersaarusiortoqartariaqartoq, IA sinnerlugu Inatsisartunut ilaasortaq Olga P. Berthelsen oqarpoq.
Meeqqat atuarfianni immikkut ittumik atuartitsisarnerup Namminersorlutik Oqartussanit nalilersorneqarnissaa siunniunneqartoq, Palle Christiansenip ukioq manna juunimi oqaatigaa.
