Assi: KNR

Naalakkersuisup Pituffimmi nutarterineq misissuiffiginiaraa

USA-p Pituffimmi radarimik 250 millionit koruunit sinnilaarlugit nalilimmik nutarterinerata kingunerisinnaasai nunanut allanut naalakkersuisup misissorpai

Amerikamiut Pituffimmi radarimik 250 millionit koruunit sinnilaarlugit nalilimmik nutarterinissamik aalajangernerannut Namminersorlutik Oqartussat peqataatinneqarnerusussaasimanersut maanna misissorneqassaaq. Nunanut allanut naalakkersuisoq, Suka K. Frederiksen taama nalunaaruteqarpoq.

Danskit nunanut allanut tunngasunut ministereqarfiat saaffigereersimagitik, Suka K. Frederiksenip oqaatigaa.

- Ilaatigut paaserusupparput, radarimik nutarterineq 2016-imi ingerlanneqartoq Igalikumi isumaqatigiissummut allannguuteqarnertut taaneqarluni oqaloqatigiissutigineqaqqaarluni pisussaanersoq. Taamaattumillu radarimut ikkussuineq pillugu saaffiginnissummik tigusaqartoqarsimanersoq ilaalu ilanngullugit piffissami aggersumi akineqassalluta, Suka K. Frederiksen oqarpoq.

Ukiumoortumik nalunaarusiatigut nalunaarneq

Amerikamiulli sakkutooqarfik pillugu ukiumoortumik nalunaarusiamikkut radarimik nutarteriniarnertik allaffissornikkut nalunaarutigisimagaat, naalakkersuisup erseqqissaatigaa.

AAMMA ATUARUK USA radarimik annertusaanissaminut akuerineqareerpoq

Pituffimmili kiffartuussinissamik isumaqatigiissummut suliaq ukkatarineqarsimammat, radarip nutarterneqarnissaa Naalakkersuisunit immikkut oqallisigineqarsimanngitsoq, Suka K. Frederiksen oqarpoq.

- Pituffimmi radarip nutarterneqarnissaa pillugu ukiumoortumik nalunaarut aqqutigalugu allassimasoqarpoq. Taava apeqqutaavoq taanna allassimaneq qanorpiaq paasineqassanersoq. Kisianni soorlu oqareertunga, una kiffartuussinermut isumaqatigiissummut nukiit tamarmik atorneqarput. Taamaattumik suleqatigiiffiusut allat unikkallarnikuusimapput, isumaqatiginninniarnernut arlaannaatigulluunniit akuliukkumanagit, Suka K. Frederiksen oqarpoq.

Amerikamiut Pituffimmi radarimik nutarterinissamik aalajangernerannut  Nunarput peqataatinneqarsimasariaqaraluartoq, atuakkiortoq, Hans Jakob Helms Jyllands-Postenimi allaatigisamini marlunngormat allappoq.

Helms naapertorlugu, radarimik nutarterineq pissutigalugu sakkutooqarfiup amerikamiut akeraannit saassunneqarnissaa aarlerinarnerulerpoq, radarimillu nutarterineq 2020-mi naammassippat, nunarput nunat allat sakkutuuinit saassutassatut inississalluni.

Ataatsimiititaliaq ilisimatinneqarsimanngitsoq

Helmsip Igalikumi isumaqatigiissut innersuussutigaa, tassanilu allaqqavoq, Pituffimmi annertuunik allannguisoqassatillugu nunarput paasiniaavigineqaqqaattussaasoq.

Nunanut allanut sillimaniarnermullu ataatsimiititaliaq radarip nutarterneqarnera pillugu ilisimatinneqarsimanngitsoq ataatsimiititaliami ilaasortat, Demokraatineersup Justus Hansenip aamma Siumumeersup Vivian Motzfeldtip, sapaatip akunnerani matumani oqaatigaat.

AAMMA ATUARUK Pituffimmi aningaasaliisimaneq ataatsimiititaliami ilaasortat ilisimasaqarfiginerorusuppaat

Suka K. Frederiksenillu Naalakkersuisut Inatsisartullu ilisimatinniarlugit USA-p radarimut aningaasaliinerat maanna misissuiffiginiarpaa.

Nunarput navianartorsiornerunersoq misissoraa

- Igalikumi isumaqatigiissummi allassimavoq, annertuumik allanngortoqassatillugu nunarput pinngitsoorani akuliunneqartussaasoq. Tamaattoqarsimanersoq nalilersussagaanni, taava paasissutissat tamakkiisut tigummineqartariaqarput. Taamaattumik allaffissornikkut arlalinnik suliaqartitsivunga, paasissutissat tamakkiisut pigerusullugit. Paasissutissat tigoriarukkit Naalakkersuisunut soorunami qaqittussaavakka, taamatullu aamma nunanut allanut sillimaniarnermullu ataatsimiititaliamut paasissutissiisussaallunga. Alloriarfissat tamarmik tamatuma kingorna ersarissinerusussaapput, Suka K. Frederiksen oqarpoq.

AAMMA ATUARUK Pituffimmut aningaasaliinermi Kalaallit Nunaat akuutinneqartussaagaluarpoq

Taassuma ilaatigut paaserusuppaa, radarip nutarterneqareerpat nunarput sakkutuunit saassunneqarnissaminut navianartorsiornerunersoq.

- Nunarput ilumut ulorianarnerusumik inissinneqarpa? Arlaannaatigulluunniit eqqorneqarnissaminut inissisimanerulerluni maannakkut killiffeqartinneqarpa? Qallunaat naalagaaffiannut paasiniaaninni apeqqutit akissutissarserusutakka ilaatigut tamakkuupput. Uagut nunarput pineqartillugu arlaannaanulluunniit ulorianarnerusumik inissisimasoqarsimassappat nunatta soorunalimi akuliunnissaanut, peqataatillugu oqalliseqataatinnissaanut, pisussaaffeqaramik, nunanut allanut naalakkersuisoq, Suka K. Frederiksen oqarpoq.

Isummersuutit



Nutaarsiassaateqarpit?

Nutaarsiassaateqarpit?

1717-imut SMS-erit, UNNIA allariarlugu kingornalu oqaluttuat allallugu.

Immersuivik atorlugu allaffigitigut knr.gl/1717

Emailikkulluunniit 1717@knr.gl

KNR TV: TekstTV-mi paasissutissat

TTV q 110 Ullut tamaasa nutaarsiassat

TTV q 400 Timmisartuutinissat
aallartussat tikitussallu

TTV q 300 Tv-kkut aallakaatitassat
tulleriiarnerat

TTV q 300 radiukkut allakaatitassat
tulleriiarnerat