Helms: Pituffimmut aningaasaliinermi Kalaallit Nunaat akuutinneqartussaagaluarpoq

Radarip nutarterneqarnera, 250 million koruunit sinnerlugit naleqartoq pillugu Namminersorlutik Oqartussat isumaqatigiissuteqarfigineqaqqaartussaagaluarput.

Atuakkiortoq Hans Jakob Helms taama isumaqarpoq. Taanna USA-p nunatsinni sakkutooqarfiinnik nakkutilliinermi ataatsimiititaliaani ataavartumik ilaasortaasimavoq Siumullu folketingemut ilaasortarisaanut allaffimmi pisortaasimalluni.

Helmsip allakkamini amerikamiut sakkutuuisa nalunaarusiaat tunngavigaa. Amerikamiut sakkutooqarfii, nunani allaniiillutik sallerpaatut inissisimasut, akerleriissuteqarnermi navianartorsiornerpaasut nalunaarusiap imaraa.

Aningaasaliineq nutarnerineruvoq

Pituffik sakkutooqarfiit arfiniliusut taamaattut ilagisaat, nutarteriffigineqarsimavoq, USA-p qaartartunut silaannarsuakkoortartunut illersorneqarnerat pitsanngorsarumallugu. Sakkutooqarfillu taamaalilluni USA-p akeraanut saassutassatut inissisimavoq.

Radarimik nutarterineq ima tamakkiitigaaq, allaat nutaanngortitsinerulluni, taamaammallu Igalikumi isumaqatigiissut 2004-meersoq malillugu aningaasaliineq Namminersorlutik Oqartussanik isumaqatigiissuteqarluni pisimasariaqaraluartoq, Hans Jakob Helms isumaqarpoq.

AAMMA ATUARUK Pituffik 40 millionit dollarsit nalinginut nutarteriffigineqartoq

Illersornissami atortulersuutinik Namminersorlutik Oqartussat akuuffigerpasinngisaannik nutarterisimanerat, Helmsip nangaanartoqartippaa.

- Taama pisoqarnerani Kalaallit Nunaat navianartorsiorneruliinnanngilaq. Nuna aammattaaq aningaasarpassuarnik annaasaqarpoq. Danmarkimi assingusumik pisoqarsimagaluarpat kusanaatsuliornerujussuartut isigineqassagaluarpoq, Helms allappoq.

AAMMA ATUARUK Dialogen om Pituffik er ufrugtbar