Suka K. Frederiksen Pituffik pillugu oqaloqatigiinnerit sunniuteqarpallaanngillat
Pituffimmi kiffartuussinissamut isumaqatigiissut amerikamiullu oqallisigineqarlualeruttortoq, Anders Samuelsenip KNR-imit sapaatip akunnerata siuliani apersorneqarami erseqqissaatigaa.
Suka K. Frederiksenip oqaaseqarnermini ukiuni marlunni oqaloqatigiinniarnerit sunniuteqarpallaanngitsutut oqaatigai. Ilanngullugulu RAL-ip imaatigut angallassinermut isumaqatigiissut ineriartornerluttoqarneratigut annaasimagaa oqaatigalugu.
AAMMA ATUARUK Kiffartuussinissamik isumaqatigiissuteqannginneq RAL-imi qissatigineqanngitsoq
Naak ukiuni marlunni oqaloqatigiinniarnerit sunniuteqarpallaarsimanngikkaluartut nunanut allanut tunngasunut naalakkersuisup siunissami oqaloqatigiinninnissat neriuuteqarfigai.
AAMMA ATUARUK Pituffik pillugu suli oqaloqatigiittoqarpoq
Suka K. Frederiksenip danskit nunanut allanut tunngasunut ministeriat peqatigalugu amerikamiut nunanut allanut tunngasunut ministeriat, Rex Tillerson upernaaq ataatsimeeqatigaat. Tassanilu kalaallit danskillu Pituffimmut tunngatillugu politikkikkut inissisimanerat saqqummiunneqarpoq.
AAMMA ATUARUK Suka K. Frederiksenip USA-p nunanut allanut ministeria naapikkaa
- Ataatsimut oqariartuutigisavut amerikamiunit tiguneqarlutillu paasineqarput, tamatumalu suliareqqinnissaa ingerlatissavarput, amerikamiut isumaqatigiininniarfigineqarneri ingerlateqqinneqarput, danskit/kalaallit isumaqatiginninniartitaasa isumaqatiginninniarnissamut missingiut amerikami oqartussaasunut ingerlateqqinnikuuaat - tamatumalu eqqartorneqarnissaa anguniarlugu USA ataatsimeeqatiginninniassamik nutaamik kissaateqarfigineqarsimavoq, Suka K. Frederiksen allappoq.