Naalakkersuisup Peqqinnissaqarfik takornarianit qanoq atorneqartiginersoq malinnaaffigigaa
Takornariartaassuarnik tuusintilikkaarpassuarnik ilaasulinnik nunatsinnut tikittoqaraangat, tamanna Peqqinnissaqarfiup suliassanik nammakkersorneqariaannarneranik kinguneqartarpoq.
Nakorsat Peqatigiiffiat sapaatit akunnerata siuliani taama isornartorsiuivoq.
- Peqqinnissaqarfiup piginnaasai takornarianut tuusintilikkaarpassuarnut tunngaviusumik naatsorsuussaanngitsuusut takusinnaavarput, Nakorsat Peqatigiifftata siulittasuata tullia Nicolai Hardenberg Larsen oqarpoq.
Peqqissutsimut naalakkersuisup, Mimi Karlsenip (IA), tamanna aamma arajutsisimanngilaa.
- Massakkumut sinerissami tikinneqakulanerusut qanimut malinnaaffigaakka. Massakkut kisitsisit pigisagut taavalu aamma aasap ingerlanerani naammassiartornissaanut malinnaaffigeqqissaassavakka taakkua qanoq annertutigisumik peqqinnissaqarfimmut atuisuunersut, taanna oqarpoq.
Qanoq artukkiitiginersut suli kisitsisaatiginngikkaat
Umiarsuarlutik nunatsinnut takornariat Peqqinnissaqarfimmut qanoq artukkiitiginersut kisitsisaatigilertinnagit Naalakkersuisut iliuuseqarneroqqissinnaanngitsut, Mimi Karlsen isumaqarpoq.
- Aammalu imaassagaluarpat peqqinnissaqarfimmut atuineq annertoorujussuanngortoq taakkuninnga takornariartaatininngannit soorunami aamma iliuusissanik ukua kisitsitit atorniassagakkit, pisaqariaqarpoq paaseqqissaassaalugit qanoq amerlatigisut ukuninga takornariartaatinik imaluunniit avataaninngaanniit allanik takornarianit allanilluunniit inunnit aamma peqqinnissaqarfiup atorneqarnera malinnaaffigeqqissaassallugu.
Tassalu Peqqinnissaqarfik qanoq atorneqarsimatiginersoq Naalakkersuisut takornariaqarneq pillugu aappaagu pilersaarusiornerminni misissussavaat.
- Aasaq manna misigisavut soorunami aappaagumut piareersarnitsinnut atassapput, taamaammallu aamma takornariaqarnermi naalakkersuisoqarfiit assigiinngitsut taakuninnga suliaqartut aamma suleqatigalugit piareersarnermi ingerlanneqassapput, Mimi Karlsen oqarpoq.
Naalakkersuisut takornariartaassuarnik angallassisartunut Peqqinnissaqarfik pillugu juulimi paasissutissiipput. Takornariat takornariartaassuarnillu angallassisartut taamaasillutik nunatsinnukartinnatik sillimaffigisassatik eqqummaariffiginerulersinnaalerpaat.
Atorfinitsitsisariaqarsimasut
Takornariartaassuit nunatsinnut ukioq manna tikittut aatsaat taama amerlatigipput. Siornami tikittut marloriaatingajaraat. Naatsorsueqqissaartarfiup kisitsisaatai naapertorlugit takornariartaassuit nunatsinnut 2022-mi tikittut 376-iusut ukioq mannalu tikittussat katillutik 626-usut, Visit Greenlandip kisitsisaataatigigallagaani erserpoq.
Umiarsuarluitk nunatsinnut takornariarpassuit ikioriaannaanissaannut piareersimajulluni Peqqinnissaqarfik assigiinngitsutigut pitsanngorsaasariaqarsimavoq.
Tassa takornarianik nakorsiartoqartillugu sillimmasiisarfinnik attaveqarnerinnarmik suliaqartussamik allaffeqarfimmi atorfinitsitsisariaqarsimapput.
Peqqinnissaqarfiup pisortaa, Tina Amondsen, KNR-imut taama ilisimatitisivoq.
Tamatuma saniatigut Nuummi nakorsamik pigaartoqarnermi ataqatigiissaarisunngortitsipput.
Tassa Nuummi Dronning Ingridip Napparsimmaviani nakorsat ilaat takornariartaassuit ilaat nakorsamik ikiortissarsiornerani qanoq iliornissamut ataqatigiissaarisuussaaq.
Tamatuma saniatigut Nuummi nakorsamik pigaartoqarnermi ataqatigiissaarisunngortitsipput. Tassa Nuummi Dronning Ingridip Napparsimmaviani nakorsat ilaat takornariartaassuit ilaata nakorsamik ikiortissarsiornerani qanoq iliornissamut ataqatigiissaarisuussaaq.
