Naalakkersuisup nannut ajornartorsiutaannginnerarai
Ittoqqortoormiini piniarnermut nakkutilliisup nanoq alapernaatsoq illoqarfimmut nerisassarsiorniaqattaartoq oktobarip ulluisa arfineq-pingajuanni qunusillugu qimaasittariaqarsimavaa.
Qeqertarsuatsiaani pingajoqqat qaammateq ataaseq sioqqullugu aamma aallaaneqarput. Tassani kommunefogdip ikiortaatalu pingajoqqat ulluni tallimani nunaqarfiup eqqaaneereersut aallaasariaqarsimavaat.
Tamanna Aalisarnermut, Piniarnermut Nunalerinermullu Naalakkersuisoqarfiup nannut aallaaneqarnissaanut akuersissuteqarneratigut pivoq.
Nannunik toqutsisoqarnissaanut malittarisassat imaapput
Inuit ulorianartorsiortitsisoqarluni saassussisoqarnerani akiuiniarsinnaapput imaluunniit pinngitsoortitsiniarsinnaapput. Tassa inuinnaat inuit isumannaannissaat pillugu akuersissuteqarfigineqarnatik nanumik toqutsisinnaatitaapput. Taamaattoqassagaluarpallu pisup kingorna tamanna oqartussanit misissuiffigineqarumaarpoq.
Nanoq najugaqarfiusumut qanillattoruni Aalisarnermut, Piniarnermut Nunalerinermullu Naalakkersuisoqarfik akuersissuteqaqqaarluni nanoq aatsaat toqunneqassaaq.
Nanoq najugaqarfiusumiippat nanoq toqunneqartariaqarnersoq politiit aalajangigassaraat. Tamanna amerlanertigut Aalisarnermut, Piniarnermut Nunalerinermullu Naalakkersuisoqarfiup suleqatigineratigut aalajangiiffigineqartarpoq.
Pisuni allani tamani nannumik pisarnissamut akuersissuteqarfiunissaq pisariaqarpoq.
Paasissutissarsiffik: Pinerluttulerinermi inatsit, Nannut piniarneqartarnerat illersugaanerallu pillugu nalunaarut, Aalisarnermut Piniarnermut Nunalerinermullu Naalakkersuisoqarfik.
Inuiaqatigiilli nannunik alapernaatsunik aallaanissaminnut oqartussanit akuersissuteqarfigineqarnissaminut utaqqisarnerat pitsaanngitsoq, Partii Naleraq isumaqarpoq.
- Nannut inunnik ulorianartorsiortitsisinnaasut illoqarfimmut appakaanniariartut inuup inuuneranik “akeqarnissaa” utaqqiinnarnagu toqunneqarsinnaasariaqarput, Partii Naleraq nannunik piniarneq illersuinerlu pillugit malittarisassanik allanngortitsinissamut siunnersuuteqarluni allappoq.
AAMMA ATUARUK Qeqertarsuatsiaat: Nannut toqunneqartut
Sumiiffinni pingaartumik nunatta avannaani Ittoqqortoormiinilu immikkut ittunik nakkutilliisunik akuersissuteqarfigineqaqqaarnatik nannunik najugaqarfiusunut appakaattunik qanillattortunilluunniit toqutsisinnaasunik atorfinitsitsisoqartariaqarsoraat.
- Nannunut ajornartorsiutaasunut illoqarfiit killeqarfiisa iluinut isaasunut akuersaannginneq atussagipput isumaqarpugut, partii allappoq.
Naalakkersuisut: Maanna aaqqiissut pitsaallunilu sukasuuvoq
Siunnersuulli Naalakkersuisunit itigartitsissutigineqarpoq. Aaqqissuussinerlu maannakkut atuuttoq ’iluaqutaallunilu sutigut tamatigut pitsanngorsaataasoq’, akissummi allassimavoq. Tamatuma saniatigut malittarisassat maanna atuuttut malitsigisaannik inuup inuuneranik akeqarsimanngitsoq allassimavoq.
Inuummi inuunera ulorianartorsiortinneqaraluarpat inuit pinerluttulerinermik inatsit naapertorlugu nanoq ingerlaannaq toqusinnaatitaavaat.
2007-imiilli nannut katillugit 74-it allatut ajornartumik toqunneqarsimapput. Nannullu 17-it 2016-imiit maannamut toqunneqarput.
Piffinni nannut najugaqarfigineqartunut eqqaanullu qanillattorneranni inuup inuuneranik ulorianartorsiortitsisoqannginneranni Naalakkersuisoqarfimmut attaveqartarneq pitsaasuusoq, Naalakkersuisoq, Jens Immanuelsen (Siumut) isumaqarpoq.
AAMMA ATUARUK Nannut toqunneqartariallit pisassiissutinit ilanngaatigineqartariaqarput
- Amerlanertigulli Naalakkersuisoqarfimmiut peqataatinneqartarput aamma taakku politiinit, kommunefogedimit, piniarnermik nakkutilliisunit suleqataasunillu allanit ikiorneqarnissaq ikorfartorneqarnissarlu neqeroorutigisarpaat. Suleqatigiinneq iluaqutaasutut aamma sutigut tamatigut pitsanngorsaataasutut isigineqarpoq, Immanuelsen siunnersuummut akissuteqaammini allappoq.
Aamma nannut nunatta kujataani – pingaartumik Nuup eqqaani ajornartorsiutaasut nunatta avannaani tunumilu ajornartorsiutaasunit sukkanerusumik ilungersunarnerusumillu oqartussanit suliarineqartartut, Partii Naleraq isumaqarpoq.
Partii Naleqqamit siunnersuut Inatsisartuni novembarip ulluisa aqqarnanni pingasunngornermi siullermeerneqarpoq.
