WWF Nannut toqunneqartariallit pisassiissutinit ilanngaatigineqartariaqarput
Nannut Ittoqqortoormiinut qanillattortarnerat najugaqartunut toqqissisimanarunnaaqqavoq. Qanillivallaartoqartillugulu inunnut navianartorsiortitsisoqaleraangat imminut illersorniarluni nannut toqunneqartariaqartarneri arlaleriarluni pisareerpoq.
Taamaattoqarneratalu nunatsinni WWF-ip immikkoortortaqarfianit Kaare Winther Hansenip politikerit iliuuseqaqquai.
- Imminut illersorniarnermi nannut toqunneqartarput, pisassiissutinilli ilanngaataaneq ajorlutik. Tamatumalu Namminersorlutik Oqartussanit atuutsinneqalernissaa kissaatiginartipparput, Kaare Winther Hansen oqarpoq.
AAMMA ATUARUK WWF innutasuunik nannunillu illersuinermi nutaami periuseqalisaaq
Nannunik toqutsisoqartariaqarnermit pisassiissutinut ilanngaataasalissanernut misissuiffigineqartoq Aalisarnermut, Piniarnermut Nunalerinermullu naalakkersuisoqarfimmi immikkoortortami pisortap Amalie Jessenip oqaatigaa.
- Nunani immikkoortukkuutaani pisartut qanoq nikerartiginersut misissoratsigu nalilersorlugulu, assiliarlu taannaaginnarpat soorunami iliuuseqassaagut, Amalie Jessen oqarpoq.
2015-imi nannut 14-it illoqarfimmut qanillivallaartut toqunneqarput. 2016-imi 17-imilu nannut arfinillit, ukioq mannalu nanoq ataaseq nalunaarsorneqarsimalluni. Kisitsisilli suli nalorninartoqartut Amalie Jessen oqarpoq.
- Nalilersuereerutta aalajangiisoqarumaarpoq qanoq pisoqassanersoq, ilanngaatigineqartalissanersut imaluunniit pisassiissutit iluaninngaannik tiguneqartalissanersut.
Nannut toqunneqartariaqartut pisassiissutinit ilanngaataaneq ajorneri ingerlatsinermut ajoqutaasoq WWF-imit isumaqarput.
- Ilanngaataasannginneri nannut piujuarnissaanut annikillisaataassaaq, Kaare Winther Hansen oqarpoq.