Naalakkersuisup KNAPK-p ikiorneqarnissamik kissaateqarnera itigartitsissutigigaa

Coronap ilungersuatitsinera aalisartunut qassiiusunut sakkortuvoq.

Saarullinniat, raajarniat saattuarniallu coronap ajornartoortitsinerani aningaasatigut ikiorserneqarnissaminnut periarfissaqarput

Ikiorsiissutilli qaleralinnianut atuutinngillat. Tamannalu aalisartut piniartullu kattuffiata ilorrisimaarutiginngilaa.

Taamaammat KNAPK-p inuussutissarsiornermut naalakkersuisoq, Jens-Frederik Nielsen (Demokraatit) marlunngornermi ataatsimeeqatigaat.

AAMMA ATUARUK Naalakkersuisoq: Qaleralinniat ikiorsernissaannik eqqarsaateqanngilagut

Inuussutissarsiornermulli naalakkersuisup, Jens Frederik Nielsenip qaleralinniat ikiorserneqartariaqannginnerannik isummani attappaa, KNAPK-llu kissaataa itigartillugu.

Taanna suliaq pillugu ataasinngormat isumasioqatigiissitsivoq, KNAPK-lli isummani allanngortinngilaa:

AAMMA ATUARUK Siunersiuineq: Aalisarnermut ikiorsiissutit sammineqalertut

 - Naalakkersuisut sinerissap qanittuani qaleralinniat ikiorserneqarnissaat piffissaasorinngilaat. Tamannalu uanga suli maannamut attappara, Jens-Frederik Nielsen KNR-imut oqarpoq.

Raajat, saattuat, saarulliillu akii coronap ilungersunartorsiortitsinerani apparnerunerat pissutigalugu ikiorsiissutit qaleralinniartartunut atuutinngillat.

Nunatta naatsorsueqqissaartarfia naapertorlugu raajat saarulliillu akii apparnerpaapput. Naatsorsueqqissaartarfik naapertorlugu raajat kiilumut akii siorna piffissamut tassunga sanilliullugit 11,3 procentimik apparput.

Saarulliit kiilumut akii 10,1 procentimik apparput.

KNAPK-p siulittaasuata, Henrik Sandgreenip qaleralinniartartunut itigartitsisoqarnera "tusaatissatut tiguinnarlugu" oqaatigaa.

Saarullinniat, raajarniat saattuarniallu ukioq manna aningaasatigut ikiorserneqarnerat 11 millionit koruunit angullugit naalakkersuisut aningaasartuutaanissaa naatsorsuutiginikuaat.

Maannamullu 1,4 millionit koruunit atorneqartut Jens-Frederik Nielsen oqarpoq.