Naalakkersuisoq: Qaleralinniat ikiorsernissaannik eqqarsaateqanngilagut

Inatsisartut aalisarnermut, piniarnermut nunalerinermullu ataatsimiititaliaata inuussutissarsiornermut naalakkersuisoq siunersiussallugu ualimut aggersarpaa, siunersiuinerlu aallatsimmat, qaleralinniat coronaqarnerani ikiorserniarneqarnersut, ataatsimiititaliami ilaasortat apersuutigaat.

- Qaleralinnianut ikiorsiissutinik eqqussiniarnermut maannakkumuugallartoq siunnerfeqanngilagut. Pissutsilli malinnaavigeqqissaarpagut, taannalu ilaatigut peqqutaalluni KNAPK-p oqaloqatiginissaa noqqaassutiginikuuara, Inuussutissarsiornermut naalakkersuisoq, Jens-Frederik Nielsen ualimut siunersiorneqareernermini KNR-imut oqarpoq nangillunilu:

- Suli aalisagaqarpoq. Taanna eqqarsaat malillugu qaleralinnianut ikiorsiissutinik eqqussinissaq siunertaasorinngilarput , Jens-Frederik Nielsen oqarpoq.

AAMMA ATUARUK Siunersiuineq: Aalisarnermut ikiorsiissutit sammineqalertut

Taanna aamma aalisartut sorliit eqqornerlunneqarnerpaanersut ikiorsertariaqarnersullu, KNAPK-p naliliinera aallaavigalugu ikiorsiissusiorsimallutik oqarpoq.

Tassami saarullinniat, raajarniat saattuarniallu ikiorserneqarnissaminnut maanna periarfissaqarput.

11 millioninit 1,4 millionit atoraat

Aalisartunut ikiorsiissutit ukioq naappat atorunnaassapput. Taakkua 11 millionit koruuninik nunatta karsiata aningaasartuutigissagai ukiaq pilersinneqarmata naalakkersuisunit ilimagineqarpoq. Maannamullu 1.4 millionit koruunit atorneqarput. Kisianni ikiorsiissutit sivitsorneqarnissaat periarfissaasoq naalakkersuisoq oqarpoq.

- Ukioq naappat suli coronaqarluni, pissutsit malinnaavigalugit aalisagaqatigiit eqqartorneqartut eqqarsaatigalugit nalilersuiumaarpugut qanoq ittoqassanersoq, Jens-Frederik Nielsen KNR-imut oqarpoq.