Siunersiuineq: Aalisarnermut ikiorsiissutit sammineqalertut
Corona virusup ilungersunartorsiortitsinerani aalisartunut ikiorsiissutit, nunaqarfinni isorliunerusunilu inuussutissarsiutinik ineriartortitsineq aamma puisip amiinik tunitsiviit pillugit Inatsisartut aalisarnermut, piniarnermut nunalerinermullu ataatsimiititaliaat inuussutissarsiornermut naalakkersuisumut, Jens-Frederik Nielsenimut ataasinngorpat siunersiuissaaq
Ataatsimiititaliap siulittaasua, Henrik Fleischer tusagassiuutinut taama nalunaarpoq.
- Ammasumik siunersiuineq nunaqarfinni isorliunerusunilu aalisarnermut COVID19-imut tunngatillugu ikiorsiissutinut, nunaqarfinni isorliunerusunilu inuussutissarsiutinik ineriartortitsinermut kiisalu puisip amiinik tunitsivinnut tunngassuteqassaaq, siulittaasoq allappoq.
AAMMA ATUARUK Aalisarnermut ikiorsiissuteqalerpoq - ikiorsiissutilli qanoq ittuussanersut suli ilisimaneqanngilaq
Siunersiuineq Inatsisartut nittartagaatigut toqqaannartumik aallakaatinneqassaaq.
Ataatsimiititaliap taassuma aalisarnermut piniarnermut nunalerinermullu naalakkersuisoq, Jens Immanuelsen sinerissap qanittuani qaleralittassiissutit pillugit ullualunnguit matuma siornatigut siunersiorpaa.
Aalisarnermut naalakkersuisumut siunersiuneq pillugu uani atuarsinnaavutit