Aalisarnermut ikiorsiissuteqalerpoq - ikiorsiissutilli qanoq ittuussanersut suli ilisimaneqanngilaq
Sinerissamut qanittumi aalisartunut nutaarsiassatsialak qangalili utaqqineqartoq ataasinngormat nalunaarutigineqarpoq.
Naalakkersuisut raajarnianut, saattuarnianut saarullinnianullu ikiorsiissutinik atuutsitsilerput.
Ikiorsiissutilli qanoq aaqqissugaassanersut suli ilisimaneqanngilaq.
Akit appangaatsiarnerat nunarsuup annersaani Covid-19-ip tuniluunneranut toqqaannartumik atassuteqarput, tamannami neriniartarfinnut neriartortarnitta ikilingaatsiarneranik kinguneqarpoq.
Raajat saarulliillu akii pingaartumik apparsimasut, naatsorsueqqissaartarfimmit 2020-mi januaarimiit juulimut aalisakkat avammut tunisaanerannik nalunaarusiami allassimavoq.
Kiilumut akii ima appartigaat
Aalisakkat pingaarnerit kiilumut akii ukioq manna qaammatit siulliit arfinillit ingerlaneranni siorna piffissamut tassunga sanilliullugit appariarput.
- Raajat kiilumut akii 11,3 procentimik apparput.
- Saarulliit kiilumut akii 10,1 procentimik apparput.
- Qalerallit kiilumut akii 6,1 procentimik apparput.
Avammut tunisat nalingi ukioq manna januaarimiit juulimut siorna piffissamut tassunga sanilliullugit 129 millionit koruuninik apparsimasut, Nunatta naatsorsueqqissaartarfianit kisitsisit nutaat takutippaat. Tamanna 4,7 procentimik appariarnerup assigaa.
Qanoq ikiorsiisoqartoqartassanersoq inuussutissarsiornermut naalakkersuisoqarfimmit Inuussutissarsiornermullu naalakkersuisup Jens-Frederik Nielsenip (D) oqaaseqarfigiumanngilaa.
Aalisartut qaqugu, sutigut qanorlu ikiorserneqarsinnaanersut KNR-imit paasiniaraluarparput. Akissutisinaguli.
Naalakkersuisoqarfilli KNR-imut naatsumik ima akivoq:
- Politikikkut aalajangigaq allaffissornikkut maanna timitalerniarneqarpoq. Ikiorsiissutit allaffissornikkut sinaakkutissaat tassa ilusilersorneqaleruttorput. Qaquguli piariissanersoq suli nalunarpoq.
KNAPK-p Naalakkersuisut ataatsimeeqatigaa
KNAPK-p pisortaanera Tønnes "Kaka" Berthelsen Naalakkersuisut marlunngornermi ataatsimeeqatigai.
- Malittarisassat pillugit ataatsimeeqatigissavagut, ilaatigut periuusissat annerusumik eqqartornissaat naatsorsuutigivara. Suli nalorninarpoq qaqugorpiaq piariissanersoq, taanna marlunngormat oqarpoq.
Aalisakkanut akit ukiup siulianut sanilliullugit qanoq apparsimatigineri ikiorsiinissamut apeqqutaapput.
Naalakkersuisulli aalisakkat akiisa apparnerat tamakkerlugu matussusissanngilaat. Aalisartut aamma annaasaqaatigissavaat.
Aalisakkamut aki 15 procentimik apparsimappat, aalisartut annaasatik tamaasa namminneq matussusissavaat. Akilli 15 aamma 25 procentillu akornanni appassutaat Naalakkersuisunit matussuserneqassaaq.
Ikiorsiissutit 11 millionit koruuniusut
Aningaasaqarnermut naalakkersuisoqarfiup sinerissamut qanittumi aalisartunut ikiorsiissutinut 11 millionit koruunit missaanniittut decembarip 31-ata tungaanut atorneqassasut naatsorsuutigaat.
Aalisakkanulli akit apeqqutaapput.
Naalakkersuisut inuussutissarsiutinut ikiorsiissutit decembarip 31-ata tungaanut aamma sivitsorpaat. Taakkununnga 10 millionit koruunit atorneqarnissaat naatsorsuutigineqarpoq.
