Naalakkersuisup Canada suleqatiginerorusukkaa
![](/sites/default/files/styles/image_934x467/public/suka_f_northern_lights.jpeg?itok=BMx2vbpk)
Canadami Ottawami niuernikkut nittarsaassinermi ataatsimeersuarnermilu Northern Lightsimi kalaallit aallartitaat tikilluaqquneqarput, nunanullu allanut tunngasunut naalakkersuisoq Suka K. Frederiksen oqalugiarmat nuannarineqarpoq tapersersorneqarlunilu.
Ataatsimeersuarnermik aaqqissuisuupput Nunavummi Labradorimilu niuernikkut suleqatigiit Makivik korporation suleqatigalugu.
Ataatsimeersuarneq nittarsaassinerlu Ottawami ukioq allortarlugu aaqqissorneqartarpoq, inuillu 1500-it missaannik amerlatigisut, suliffissuaqarfinnit niuertunit naalakkersuisunillu arlaqartunit peqataaffigineqartarpoq.
Nunanut allanut tunngasunut Naalakkersuisoq Suka K. Frederiksen oqalugiarmat inersuaq tusarnaartunik ulikkaarpoq, oqalugiarami Kalaallit Nunaanni aningaasarsiornikkut periarfissaat amerlasuut nutaat issittumut soqutiginninnerup annertusineranut malitseqartut Naalakkersuisup oqaatigai.
Oqalugiarnermini pingaarnertut Kalaallit Nunaata Canadamik Amerika avannarlermillu suleqateqarusunnnera saqqummiuppaa.
Timmisartukkut aqqutinik nutaanik periarfissanik suleqatigiiinnerup ajornannginnerulerneranik kinguneqarsinnaasut Suka K. Frederiksen oqalugiarami eqqaavai.
Suka K. Frederiksenip oqalugiarnera nuannarineqarpoq inersuarmilu tusarnaariat apeqqutissarpassuaqarput.
Oqalugiareermat oqalugiartut allat isumaqatigalugu saqqummiussipput.
Suka Frederiksen ataatsimeersuarnerup ulluisa kingulliit tullianni aamma oqalugiarpoq, tamatumuuna Northwest Territoriami naalakkersuisut siulittaasuat Bob Mcleod peqatigalugu. Bob Mcleodip oqalugiarami avannaata kujataatalu suleqatigiinnerat piinnarnagu kangiata kitaatalu attaveqarnerat nukittorsarumavaa.