Politikki KNR pillugu nutaarsiassat

Naalakkersuisuoqarfik: Pilluaqqussutit aningaasanillu tapertilluni aallakaatitassat ussassaarutaanngillat

KNR-ip ussassaarinikkut aningaasat isertittagai naapertorlugit ukiup tullianinngaaniit KNR-ip tv-kkut radiukkullu ussassaarinikkut isertittarigaluagai matussuserniarlugit Ilinniartitaanermut, kultureqarnermut, ilisimatusarnermut ilageeqarnermullu Naalakkersuisoqarfik qanoq aningaasaliiffigitigissallugit nalilersuipput.

Allattoq Ivik Kristiansen, Laura Aggernæs

maajip 08-at 2015 12:10

Naalakkersuisut 2016-imut aningaasanut inatsimmi tusagassiuutinut ikiorsiisarnissamut aaqqiinikkut KNR-ip aningaasat annaasussaasai matussuserniarlugit aningaasaliiniarput.

- KNR-ip ussassaarutinit aningaasarsiarisarnikuusai kisillugit suli naammassinngilagut, qassioqqissaarnersulli oqaatigisinnaanngikkaluarlugit aningaasat ilanngaatissat ilanngaatigereerlugit isertitat 2-3 millionit koruunit missaanniissoraagut, Ilinniartitaanermut, kultureqarnermut, ilisimatusarnermut ilageeqarnermullu Naalakkersuisoqarfiup immikkoortortaqarfiani pisortaq Daniel Gottrup oqarpoq.

KNR-imi pisortap Jacob Abelsenip KNR-ip ussassaarutitigut aningaasat isertittagai 4 millionit koruunit missaanniittut pingasunngormat oqaatigaa.

Aamma atuaruk KNR-ip pisortaa: Naalakkersuisut pilersaarutaat ersernerluppoq

Kisitsisillu amerlanerunerat nassuiaatissaqarpoq.

Nalunaarutit, pilluaqqussutit aningaasatigut tapertillunilu timersortunik toqqaannartunik aallakaatitsisarnerit Naalakkersuisoqarfiup nalilersuinermini ussassaarutitut nalilersunngilai.

- Suliagut politikkikkut soorunami akuerineqaqqaassapput, kisianni ussassaarutitut naatsorsuutigisavut kisimik suliatsinnut ilaatippagut. Pilluaqqussutit aningaasanillu tapertilluni aallakaatitassat ilanngutinngilagut, Daniel Gottrup oqarpoq.

Taamaasilluni Naalakkersuisoqarfiup suliaa politikerininnagaanniit akuerineqassappat, pilluaqqussutit, nalunaarutit tapertillunilu aallakaatitassiarineqartartut KNR-ikkut suli tusarneqarsinnaallutillu, isiginnaarneqarsinnaassapput.

Aamma atuaruk Andreas Uldum: Biilimut ussassaarutip peerneratigut tamat oqartussaaqataanerat innarlerneqarnavianngilaq