Andreas Uldum: Biilimut ussassaarutip peerneratigut tamat oqartussaaqataanerat innarlerneqarnavianngilaq
- KNR-ip suliassaasa annerparivaat public servicemik suliaqarnissaq, taamaammat pingajussaaneerinninnermi allannguutissatut siunnersuut immaqa utaqqimaalaaraanni taava tunngavissat takulluarneqarsinnaanngussapput. Uani sumilluunniit ajornerulersitsinissaq siunertaanngilaq. Kisianni uani namminersortut, nuna tamakkerlugu tusagassiorfiit, ussassaarinissaannut periarfissikkusunneruvagut, Andreas Uldum oqarpoq.
Naalakkersuisut KNR ussassaarinikkut aningaasarsiorsinnaajunnaartippassuk aningaasaliiffiginerunissaanut pilersaaruteqanngikkallartut, Naalakkersuisup aamma oqaatigaa.
Kisianni KNR-ip ussassaarutinut aningaasat isertittagaluagai matussuserniarlugit aningaasat ikiorsiisarnissamut aaqqiinikkut Nunatsinni tusagassiuutinut tapiissutaasartut amerlanerit KNR-imut tunniunneqartarnissaat anguniarpaat.
Aamma atuaruk KNR-ip pisortaa: Naalakkersuisut pilersaarutaat ersernerluppoq
Qanorpiarli aaqqiinissaq ingerlanneqassanersoq, tapiissutillu qanoq amerlatigisut KNR-imut tunniunneqartassanersut Andreas Uldumip suli akilluarsinnaanngilaa.
- Aaqqissuusseqqinnermik pisoqassaaq. Taanna aningaasanut inatsisissatut siunnersuutip pingajussaaneernerani qanorpiaq inissinneqassanersoq saqqummiunneqassaaq, Andreas Uldum oqarpoq.
KNR-ili ussassaarisinnaajunnaassappat tusagassiinermut killilersugaanngitsumut tamallu oqartussaaqataanerannut sunniuteqarnerlunnavianngitsoq Naalakkersuisup qularinngilluinnarpaa.
- KNR-imi biilimut ussassaarummik ullaakkut tusaasaqassanngikkaluarutta tusagassiinermut minnerpaamilluunniit innarliissasoq isumaqanngilanga, aningaasaqarnermut Naalakkersuisoq Andreas Uldum oqarpoq.
