Assi: Gâbánguak Bidstrup

KNR-ip pisortaa: Naalakkersuisut pilersaarutaat ersernerluppoq

KNR aappaagu januaarip aallaqqaataaniit ussassaarutinik aningaasarsiorfeqarsinnaajunnaarnissaa Naalakkersuisut kissaatigaat. Taamaasiornissarli KNR-imut qanoq sunniuteqassanersoq, KNR-ip pisortaata Jacob Abelsenip nalorninartoqartippaa.

- Ussassaarutit mattunneqassappata sunaqqissaaq pineqarnersoq ersernerlunnera pissutigalugu qanoq kinguneqassanersoq maaannakkuugallartoq nalornissutigaarput, Jacob Abelsen oqarpoq.

2015-imut aningaasanut inatsit pillugu isumaqatigiissummi, Siumumit, Atassummit Demokraatinit Aningaasanullu Naalakkersuisumit ippassaq atsiorneqartumi, KNR ussassaarutinik aningaasarsiorfeqarsinnaajunnaassasoq kissaatigineqarpoq.

KNR ussassaaruteqarsinnaajunnaassappat aningaasat annaasat 2016-imut aningaasanut inatsisissami matussuserneqartarnissaat aningaasanut inatsisissatut isumaqatigiissummi pilersaarutaavoq.

Jacob Abelsenip taanna aamma qularutigaa.

- Tapiissutinik qanoq amerlatigusunik uagut tunineqassaagut, aamma kikkunninngaanniit akilerneqassava?, Jacob Abelsen aperivoq.

Aamma atuaruk Aningaasanut inatsisissaq atsioqatigiissutigineqartoq

KNR-illu aallakaatittagaasa ikilinissai aamma aarleqqutigaa.

- Timersornermi arlaannik aallakaatitsisarnernut taakkunanngaanniit aningaasaliisoqartarmat, taakku mattunneqassanersut aamma paaserusunnarpoq, Jacob Abelsen oqarpoq.

Ussassaarutitut aningaasarsiorfiusut tamaasa suliffeqarfinninngaanneersuinnaanngitsut aamma ersersinniarpaa.

- Ussassaarinermi ukiuni siuliini katillugit 4 millionit koruuninik isertitsissutigiineqartarpoq. Aamma tassani assigiinngitsut iluaniikkamik. Soorlu inuulluaqqusisarnerit innuttaasunullu nalunaaruteqartarnerit, KNR-ip pisortaa oqarpoq.

KNR-ip nuna tamakkerlugu aallakaatitsisarnera peqqutigalugu oqariartuutiginiakkat siamasissumik apuuttartut Jacob Abelsenip aamma ersersinniarpaa.

- KNR tv-kkut ussassaaruteqartarneq nuna tamakkerlugu ingerlanneqartuugami, kiap taanna siunissami matussavaa?, Jacob Abelsen oqarpoq.

Isummersuutit



Nutaarsiassaateqarpit?

Nutaarsiassaateqarpit?

1717-imut SMS-erit, UNNIA allariarlugu kingornalu oqaluttuat allallugu.

Immersuivik atorlugu allaffigitigut knr.gl/1717

Emailikkulluunniit 1717@knr.gl

KNR TV: TekstTV-mi paasissutissat

TTV q 110 Ullut tamaasa nutaarsiassat

TTV q 400 Timmisartuutinissat
aallartussat tikitussallu

TTV q 300 Tv-kkut aallakaatitassat
tulleriiarnerat

TTV q 300 radiukkut allakaatitassat
tulleriiarnerat