Naalakkersuisoqarfinni pisortassanik marlunnik toqqaasoqartoq
Tassalu Ilaqutariinnermut, Naligiissitaanermut Isumaginninnermullu Naalakkersuisoqarfik pisortartaarpoq, soorlu aamma Aningaasaqarnermut Naalakkersuisoqarfik pisortartaartoq. Namminersorlutik Oqartussat tusagassiuutinut taama nalunaaruteqarput.
Julie Præst Wilchep, Nunatsinni pisortani sivisuumik sulereerlunilu Ilaqutariinnermut, Naligiissitaanermut Isumaginninnermullu Naalakkersuisoqarfimmi pisortatut atorfeqalernissamik neqeroorfigineqarnissaa, Naalakkersuisut ippassaq aggustip ulluisa 20-anni aalajangerpaat.
Julie Præst Wilche, Peqqinnissaqarfimmi pisortatut atorfiit arlallit ilaatigut atorfigisimavai, ukioq mannalu februaarimi Ilaqutariinnermut Naalakkersuisoqarfimmi pisortatut atorfeqarallarsimalluni:
- Julie Præst Wilchep ukiup affaata kingulliup ingerlanerani naalakkersuisoqarfinni aqutsinermik nammagisimaarnartumik ingerlatsisimanerminut ilutigitillugu Peqqissutsimik Naalakkersuisoqarfimmik aqutsinermik isumaginnissimasup suleqatiginissaa qilanaaraara, Ilaqutariinnermut, Naligiissitaanemut Isumaginninnermullu Naalakkersuisoq Martha Lund Olsen ilaatigut taama allappoq.
AAMMA ATUARUK Naalakkersuisoqarfinni pisortat soraarsitaajuartartut nunatta karsianut akisoqaat
Ilaqutariinnermut Naalakkersuisoqarfip pisortassaata atorfinitsinneqarnerata saniatigut Aningaasaqarnermut Naalakkersuisoqarfik aamma pisortartaarpoq, tassa Nikolai Sten Christensen pisortanngorami.
Nikolai Sten Christensen Nunatsinni pisortani assigiinngitsutigut aamma misilittagaqarpoq, Aningaasaqarnermullu Naalakkersuisup Andreas Uldumip Nikolai Sten Christensenip pisortatut atorfinitsinneqarnera nuannaarutigaa:
- Nikolai Sten Christensenip Inatsisartuni sulinermi ilisarisimalluakkami suleqatiginissaa qilanaaraara. Nikolai Sten Christensen sukumiisumik suleriaaseqarnermi saniatigut inuuvoq ilakkuminartoq, Andreas Uldum oqarpoq.
AAMMA ATUARUK Ilaqutariinnermut Naalakkersuisisoqarfiup pisortaata atorfini aamma qimappaa
AAMMA ATUARUK Hardenberg naalakkersuisoqarfiup pisortaatut atorfimminit tunuartinneqarpoq
AAMMA ATUARUK Inatsiseqarnermut pisortaq soraarsitaanermini aamma iluanaartitaalaavippoq
