Inatsiseqarnermut pisortaq soraarsitaanermini aamma iluanaartitaalaavippoq

Naalakkersuisut nikinnerisa kingorna soorarsitsiortortoqarsimavoq, sulisullu soraarsinneqartut ilarpassui aningaasanik kaasarfimmiulerluarlutik Namminersorlutik Oqartussani atorfitik qimassinnaasimavaat.

Aningaasaqarnermut naalakkersuisoqarfimmi pisortap soraarsitaanerminut atatillugu 2 mio. koruuninik ajunngitsorsiassaqartinneqarsimanera kingorna paasineqarpoq, aningaasanillu agguaassisoqartuarsinnarpoq.

1,2 mio. koruunit. Inatsiseqarnermut pisortap Andreas Salmonyp soraarsitaanerminut atatillugu ajunngitsorsiassai taama aningaasartarput. Tamanna Palle Christiansenip § 37 naapertorlugu apeqqutaanut akissummi erserpoq. Aningaasallu taakku immaqa allamut atorluarneqarsinnaakutsooraluarput. Palle Christiansenip aningaasanik aammalu sulisunik pikkorissunik annaasaqarneq uggoraa. 
 
- Naalakkersuisunngortut aningaasaqarnermut naalakkersuisoqarfimmi pisortamik soraarsitsinermikkut ileqqupalaaminnik nangitsiinnartutut oqaatigineqarsinnaapput. Sulisummi pikkorissup, atorfimminut piukkunnarluartup, soraarsinniarneranut aningaasarpassuit akiliutigisariaqarsimavaat, tamannalu sooruna akueriuminaatsilluinnarpara, Palle Christiansen taama oqarpoq.

Aningaasaqarnermut naalakkersuisoqarfiup pisortaata soraarsitaaneranut atatillugu assinganik oqaaseqartoqannginnissaanik isumaqatigiissuteqartoqarsimanersoq aammaa apeqqutigaa.

Akissuteqaalli Aleqa Hammond sinnerlugu Steen Lyngemit nassiunneqartoq ersarippallaanngilaq. Isertortumilli isumaqatigiissuteqartoqarsimanera saqqummiunneqarpoq, tamannalu pissutigalugu oqaaseqartoqannginnissaanik isumaqatigiissuteqarsimanersoq Naalakkersuisut oqaatigisinnaanngilaat.

Palle Christiansenilli tamatuma qanoq isumaqarnera qularutiginngilaa, Inatsisartullu Ombudsmandiata Vera Lethip Namminersorlutik Oqartussani soraarsitsinermut atatillugu isertuussinissamik oqaaseqartoqannginnissaanillu isumaqatigiissusiortoqartannginnissaanik siornatigut erseqqissaasimanera innersuussutigalugu.  

- Oqaaseqartoqannginnissaanik isumaqatigiissuteqartoqaqqippoq, taamaaliornikkummi suut isumaqatigiissutigineqarsimanersut pisortallu aningaasaataasa qanoq atorneqarneri innuttaasunit allanillu paasineqannginnissaat qulakkeerniarneqarpoq. Taamaammat kingumut oqaatigeqqissavara, oqaaseqartoqannginnissaanik isumaqatigiissuteqartoqaqqissimanera akuerineqarsinnaanngitsoq, Ombudsmandimmi oqaatigereerpaa isumaqatigiissutit taama ittut inatsisinut naapertuutinngitsut.